詩想起--四海大平安

桐花樹下--四海大平安
■陳寧貴

我等介客家語，
有四縣海陸大埔饒平韶安，
腔調有息把差別，
盡像樂音介高低，
堵堵好交織出好聽介歌仔：
四海大平安！

恁親介聲音，
恁靚介話語，
聽著就分我等心頭，
流過一陣又一陣，
燒燒暖暖介溫流。

故所客家話，
毋單淨係一種語言，
同台灣各種語言共樣，
係互相溝通融合，
共心協力發聲來：
祝福台灣！
保佑台灣！

※註：

有息把：有點
堵堵好：剛剛好
分：給
我等：我們
故所：因此
同：與
共樣：一樣