邱一帆 / 海島追想曲

之一

日月潭脣，櫻花樹下
順路播種轉來个Barawbaw住民
遇著了手擎鎗个民族救星
擎起雙手無條件
接受德化个社名
從此梅花佔領了旱稻个山田
該迎風對來黃稔稔个禾串
淨在夢中無力搖擺
教科書項仁民愛物个世界偉人
在清淨優雅个涵碧樓頂
醉飲湖光山色
該慣勢慣勢个雙耳，當然
不解Barawbaw住民个嗚嗚悲吟
也無閒情，聆聽祖靈聲聲个呼喚

之二

教室肚天真个細人仔
在老師个鞭策下
學著國語課本頂高以德報怨个領袖
觀看魚群，力爭上游

聖賢書項崇高个四維八德
在反共復國个嘴肚高談，吮血个湖蜞
無關痛癢，緊吮二二八个生靈

五千年一脈个道統，從天頂覆蓋
海島滾滾流瀉个黃河長江，湮沒
侵蝕，福爾摩莎个血肉靈魂

之三

先生講：「要講國語，如果沒有……」
佢兜拿狗牌掛在en-li个身項
en-li掛等狗牌尋轉同類
阿母講「愛聽先生个話，好好讀書！」

恬恬，從此
海島，母語，
從此，恬恬

好好讀書啊，細人仔
佢兜早就編成縱橫交錯縝密个網
網內个思想係仰般正確、仰般安全
網外个思想頭那早就掉落綿爛
好好讀書啊，細人仔
籠肚个山阿鵲也有其个自由
有成時動動仔翼胛好過無忒羽翼
好好讀書啊，細人仔
可能有一日網仔爛忒，en-li祈禱
你做得展翼飛翔，在海島个天空
毋做鷹犬，也毋做網項該條堅硬个線索

好好讀書啊，細人仔
可能，之後，你滿腦中國
也請想想，腳下，哺育生命个母親
可能，之後，你滿嘴華語
也請聽看啊，鄉下，老人家長長个道嘆

之四

蒼白無力个阿母就帥睡在病床
醫生講：子女細心个照顧係最好个解藥
遽遽來遽，毋好遲疑
島國子女心向著島國个母親
心靈个血液，從四面八方，
在海島輸送、流動
一句一句个阿母話就係一管一管鮮活个血脈
一管一管生動个血液，擔保阿母个新陳代謝
蒼白在預料中漸漸仔，轉變
紅嫩个面色在調養中，生成
康健个身影在做得預測个將來，形塑
有一日行出醫院，您會看著多元文化个花蕊
在細細个海島頂高綻放，您衷心个盼望
有一日行出海島，你會聽著多元文化个交響曲
在闊闊个世界各地播送，您尊嚴个生命
島國个母親，心心念念
島國个子女，日日夜夜

之五

田野，毋好放佢荒忒
祖宗生活个源泉，還在
請拿起钁頭，挖起
先民个智慧
山林，毋好放佢荒忒
祖靈傳講个神話，還在
請行上山路，領轉
失落个靈魂
海洋，毋好分佢流失
祖先苦難个冒險，還在
請啟動船帆，追尋
遺忘个腳蹤

同時間走相逐
同歷史談歷史
用心、用情、用筆
尋轉
海島个生命