客籍族群作家共下來用客話寫文學

創刊宗旨
客籍族群作家共下來用客話寫文學
◎邱一帆
屬於客語文學个刊物《文學客家》第1期就愛面世，這係一種追尋也係一種堅持。從客家語言到文字，從文字到客語文學，從客語文學到客語文學，這係一種追尋，過程之中會堵著當多个問題，面對問題，提出解決个方式，這係一路行下去个客家文學工作者愛有个堅持。對於客語文學意象个追尋，個人有以下个看法：
語言文化係族群个命脈，只有客家个語言文化延續、傳揚，正毋使驚無題材，客語文學个創作正有其材料、養分，也正做得延續、創新其生命，客語詩人作家，對於客家語言文化个傳承有其使命感。只要客家族群語言文化延續，客語文學創作个題材定著源源不絕。
客家文化有其特殊个、同其他族群無共樣个所在，無共樣所在个客家人也可能有無共樣个文化特色，詩人作家假使做得看著這點、看出背後深層个意義，用豐富个聯想、邏輯聯繫个能力，表現具體鮮活个形象，那應該就係本色个客語文學个意象、客家文學，而豐富个客家經驗對於客語文學个創作有其一定个幫助。
客家族群个有其語言文化變遷性、仰般捕捉著變遷个樣貌，賦予時代个意義，搭配親切、生動个形象刻畫，係現代客語詩人作家愛努力个方向，文學不該淪為道德說教，也不應該淪為文字个遊戲，意象个經營、就像美感个經營，係文學文學个生命。
意義同具體形象之間，仰般聯結成合理、邏輯、生動、鮮活个意象，係詩人作家一生人个追求；寫出意象寫出美感，感動自家、感動客家、感動大家个客語文學作品，係客語詩人作家堅持个動力同價值。
客語文學創作係客家文學創作个一部份，也做得講係目前當重要个一部分，因為客語文學个創作同客家話從生活語言提升到文學語言个高度，同時真確融入了客家文化个元素，透過客家文化个元素這兜具體个存在，同其表現出來，做得保留客家文化个元素，同時創新客家文化个意義。
做為客家作家假使做得捕捉著族群文化背後个意義，不管係傳統个、特殊个、轉變中个抑係單一个客家元素，調整具體个形象，背後深層意義之間个關係，凸顯客家文學个意象，同時也做得體現出客家傳統个、特殊个、轉變中个抑係單一个文化現象。
廣義个角度來看，使用客家話寫作文學，就溝通了客家文化同客家文學个關係，因為客家話就係客家文化个元素，盡重要个元素，假使做得看著具體个客家文化現象，看透現象背後深層个意義，用具體、形象活潑个形式表現出來，這體現了客家文學意象，同時也表現了客家文化个意象。