客語作品

●Ngai个書房

鍾理和原著，劉慧真客語譯寫

逐個讀書人大體會有一間書房，就像做將軍个有佢个辦公廳，工程師有佢个設計室，木匠有佢个工作間。該底背擺設lau佈置就照佢个性體、興趣lau眼光來安排，所有个東西裝到盡好勢，佢到底背做事、或者歇睏、或者坐下來思考，就感覺自由、舒爽lau安寧。

假使一個讀書人無書房，該就可比一個細妹仔無自家个房間，起居坐臥就會感覺無落無著；無定著佢永遠得毋到安全lau恬靜个心情。

Ngai歇个屋仔本底係做芎蕉乾个工廠。地坪還毋會忒細，毋過除忒當央兩間勉強還像房間以外，四圍團團轉就係過廊。Ngai兜个灶下，亦係隔一段廊來使用，該還使講過設一間書房？

正經想愛新起一間，這十多年來艱苦介生活，早就逼到ngai兜學會簡單過日，奈有力量做到？毋單淨恁仔，講起來亦十分見笑，ngai連一張書桌亦無。屋家除忒一張細茶桌，就存一張食飯个桌仔。這桌仔還係祖先留下來个，到者下已經係「四代功臣」咧；桌面有兩位爛空，碗放等險險就會落下去；兩隻桌腳亦朽( mut)到愛另外想辦法縛(tho)等正做得用。

開頭个時ngai用這張桌仔寫東西。該係樣般毋方便就毋使去講咧，單講佢像搖籃樣搖來搖去，或者撇筆時多用一點點力，佢就會搖到吱吱響，分你著驚，無定著你个靈感就恁樣走到無存半滴，該就chhoi ko 咧。 Ngai識咒誓定著愛賺一筆錢來買新桌仔。皇天不負苦心人，後來竟然做到咧，寫字个時節毋使過提心吊膽。毋過，這時ngai已經毋用飯桌寫字咧—―因為ngai已經有ngai个書房！Ngai个書房！哦，ngai相信毋會有人个書房會比佢還卡好，還卡分人滿意！ 你毋使揣(thon)係毋係ngai挖到金礦，變成大富翁，故所專工起一間派頭个書房。

毋係恁樣！ngai lau頭擺共樣「苦到屙痢肚」。毋過ngai終究還係有一間自家个書房咧。Ngai這書房毋係做个，亦無法度使錢來做；佢係ngai自家「發現」个。 Ngai个書房就係這片朗朗天地！Ngai个屋家有一片闊闊个天井，頭擺係用來曬已經薰燥个芎蕉乾。幾年前ngai順等天井唇邊个坎下，種下幾頭Mexico種木瓜。兩三年以後，木瓜樹生到丈零高，歸叢仔密密个大葉，像人个手掌樣。假使係好天，樹底下就會有涼沁沁个影仔。一年間，從秋分到春分个半年當央，這樹影會橫橫e斜過天井來。

有一隻冬日，該樹影又斜過天井來个時，陰涼个烏影分ngai一個靈感。Ngai lau藤凳搬來，又兜一張圓几放紙筆、墨水等等，然後就到該下背開始寫東西。

Ngai个書房係一塊長無一尺、大約闊七寸个細板仔，一片用手拿等，另外一片就架到藤凳个扶手下。樹影會隨時慢慢e徙，故所ngai亦愛騰等停動，差毋多隔半點鐘就愛徙一擺。

Ngai盡中意自家个發現，這實在忒靚咧！忒靚咧！

到該片寫東西又歡喜、又暢快。暗摸唏嗦个屋仔，還有該搖來擺去个桌仔，比就毋使比咧；就算係天底下起到最派頭个書房，亦比佢毋贏！

可能你个書房係明窗淨几，雕金飾玉，無定著桌頂還放一盆典雅个古梅，壁上掛名人書畫，毋過比起ngai面前个偉大河山，深遠無邊个藍天，阡陌橫斜个禾田，該兜就分人感覺俗，無麼該好拿出來講咧。

可能你个書房盡派頭，ngai个恁簡單，毋過ngai毋愛你个派頭，顛倒愛ngai个恁簡單。因為佢就在天公底下，光線足；因為佢就在山腰，居高臨下，面前个山川、田園，庄頭个雲煙、竹叢、樹林lau人物，還就在眼前。你个書房lau你限制到房間底肚，分你lau外背隔開來；ngai个書房又無屋頂又無圍牆，佢就在闊闊个天地當央，lau自然結合成一體。

有時節ngai寫到khioi咧，就放下紙筆，昂起頭來看天頂，白雲在該片定定e舒展、變換。有時節佢兜歸團仔向西北方向恬恬e徙過去，影仔就在下背个山頭lau田園掩過，一下光，一下暗，氣象萬千，變化無窮。田園像一片綠色个海洋。假使堵到農事盡無閒个時，做得看到歸片投該位停動个細點樣个人影。佢兜煞猛掘地，種出生命个養份。該種樣子，緊張，毋過和平、勤奮，而且歡喜。還有一蕊蕊个火煙，遠山如黛。大自然為ngai畫出一片偉大開陽个圖畫，該係任何人造个書房底背就毋會有个 。

該係一首宇宙个詩！立春以後，樹影漸漸收起來，一過春分，佢就忒短無法度容人咧。毋過從木瓜樹影得來个靈感，分ngai曉得去利用別種樹影。好在屋家周圍毋愁無這種樹影，毋管係草坡上、果園或者屋後个山崎，滿奈就有。只要有一堆樹影，過加上一張藤凳、一塊板仔，ngai就有書房，就做得坐下來寫字，毋使過為烏暗个屋仔lau孔翹个桌仔傷心咧。舊年个幾陣風颱，分ngai个木瓜樹不係斷截，就係橫倒，無存半頭。Ngai燃時又過種幾頭細个木瓜樹下去，而且lau佢兜種到還卡接近天井所在，這下已經有三尺零高咧。毋定著等到明年寒天个時節，佢就做得分ngai幾位涼沁沁个樹影。該量時，ngai又有一等个書房咧！