[台文戰線第19期
編輯室筆記]
行台語路走揣故鄉 ／胡長松
三月的春天，一群台語作家朋友騎鐵馬，行踏佇春天的西拉雅。雖然故鄉就佇阮的跤步下，毋過，阮攏真清楚，假使若毋是因為台語文學的存在，故鄉，就會沓沓仔佇阮的面前消失去！每一个寫台語文學的朋友攏真清楚，位過去到這馬，阮就是按呢一个續一个，行台語路咧走揣故鄉。
就算世界文壇的風華萬千，現代文藝的美麗百變，若毋是故鄉的氣味、色水、感情，若毋是透過母語來感應、來表現，閣按怎風華美麗，攏離開咱的生命本質真遠；相對，若毋是透過族群母語的特殊性，世界敢願意看咱？
佇這期「詩人之道騎春」的專輯，你會使讀著眾人佇其中的思考。
戰後台語文學的發展，詩是尚早尚濟，位1980年代尾到今，現代小說的數量佮質嘛倍數提昇，毋過散文，感覺上就較無受著注意。其實，本刊發現，近來台語散文嘛有進步的現象，咱有必要對台語散文的發展做一个觀察，所以，阮才會先安排這期的「台語散文大展」來佮各位見面。想袂到這期會使一擺展出12篇，若加上囥佇「詩人之道騎春」專題的3篇，就是攏總15篇的成績矣。這內面，有故鄉，嘛有世界；有歷史，嘛有未來；有感情，有敘事，嘛有論理；會使講，台語族群的存在、思想、精神佮感情，大約會使佇這期的散文內面讀著。本刊預測，咱連鞭欲看著台語散文豐收期到位矣！
這期編煞正是南台灣熱天的暴雨到位，願你的精神體力親像現此時罩佇田園土地頂懸的雨水，遐呢仔飽足，遐呢仔有活氣！
（2010/6/15佇高雄內惟）
台文戰線第19期 2010.07
每期200元 一年4期700元
請劃撥 42264462 戶名 蔡宛玲
0 Comments:
張貼留言
<< Home