繡五更

繡五更

一更鼓打月東升，妹在房中繡手巾。繡條青龍長五尺，時時刻刻繞郎身。囑郎永遠莫斷情。

二更鼓打月照樓，手拈花線繡枕頭。不繡閒花並野草，繡對鴛鴦水面浮。同郎偕老到白頭。

三更鼓打月當空，繡幅帳圍掛房中。愛繡農村山水景，花香谷熟四時紅。年年慶祝收成豐。

四更鼓打月西斜，繡對紅燈畫朵花。紅燈掛在門楣上，照耀郎家真光華。同郎攜手轉婆家。

五更鼓打天大光，繡好新鞋送情郎。莫嫌妹妹繡工淺，左是金雞右鳳凰。相親相愛甜過糖。


----------------

女：想唱山歌無口才，想捉鷓鴣無雕媒。想照蛤蟆無燈火，柬好阿哥難做堆。

男：嶺崗頂上種布驚，唔使淋水也會生。總愛兩人情相願，唔使媒人也會成。

女：絲線織網丟落河，唔知網裡有魚麼。阿哥人才妹中意，唔知阿哥愛妹麼。

男：河裡撒網盡力丟，有魚無魚慢慢收。阿妹戀哥心莫急，團圓日子自然有。

女：白鶴落田腳系長，莫怪阿妹唔大方。初戀阿哥妹膽小，嫩草唔曾見過霜。

男：墻內種花墻外開，花高樹矮伸出來。心想上前剪一朵，新打剪刀口難開。

------
送郎送到祖公堂，阿哥點燭妹點香。阿哥點燭多富貴，阿妹點香保安康。

送郎送到白石崗，踢破腳趾血茫茫。扯開羅裙包腳趾，阿哥痛肉妹痛腸。

送郎送到船渡頭，問郎何日正（才）回頭。去時菱角未開花，轉時菱角滿塘浮。

送郎送到船渡頭，哥妹分手心憂愁。賺到銀錢回家轉，轉來家中建高樓。