天光日

面對-----天光日 / 陳寧貴
1.

清康熙六十年（西元1721年）
得人驚个消息
比箭仔還較遽較利
直直射入客家庄人个心肝頭

聽講朱一貴个部隊
蓋像一大片烏雲
烏天暗地
緊飄向下淡水溪

這愛仰般正好？
逐儕在問：
客家族群對唐山
拼命渡過會食人个烏水溝到台灣
台南安平上陸後
根本就尋毋到著腳所在
千辛萬苦南下
來到屛東竹田濫濫庄開基
用血汗同泥漿作戰百過年
正用銅皮鐵骨建立起家園
現下朱一貴佢等就愛入侵
這愛仰般正好？
這---愛仰般正好？

2.

客家庄一下間
就慌慌跌落
分人掛吊个險惡大風大浪底肚
客家大老也惶惶趕遽相邀
在內埔媽祖廟集合開會

黏時決定
十三大庄六十四小庄
成立六隊﹝堆﹞鄉團
中堆﹝竹田鄉﹞、先鋒隊﹝萬巒﹞
後堆﹝內埔鄉﹞、前堆﹝麟洛、長治﹞
左堆﹝佳冬、新埤﹞、右堆﹝美濃、高樹﹞
特別選出盡得人望个大總理李直三帶頭

這時節
發出晴天霹靂號召
硬頸熱血客家好漢
蓋像大海湧
對四面八方湧來
組織成一萬三千零儕个雄獅大軍

共下用雷公聲宣誓：
我等个客家家園同客家命脈，
我等定著會再用銅皮鐵骨保護等！

3.

客家軍在下淡水溪个平原
用肉身築起鐵樣堤防
擋等像土石流沖來个敵軍
分六堆客家庄
每一吋土地
每一粒禾榖
都無半息著傷

後來个
1732年吳福生事件
1786年林爽文事件
1895年抗日事件
六堆子弟英勇出堆保護家園个故事
像恁烈个日頭
永遠照耀在世人心肝底肚

不時愐起
頭擺該恁紅个鮮血
流在客家家園
一點一滴
蓋像忠義个種籽
在六堆个大地發芽
既經開出盡靚个
台灣之花