客語作品

●「大禾埕」/陳寧貴



大禾埕盡像人生介舞台

蓋多戲佇這位

一遍又一遍演出



農忙時節

晒穀晒豆晒到人面像紅面番鴨公

大人同細人講唔莫亂走

當當晝晝鬼上樹



平常時節

細人佇大禾埕搞聊

散落一地

歡歡喜喜介腳步聲



暗晡頭時節

大人端凳來大禾埕

講頭擺生趣事情

汝一言我一語盡像畫符誥

月光聽到笑迷迷



有時節大禾埕麼介也沒

一個九十歲老伯婆

坐在屋簷唇看大禾埕

緊看緊大

緊看緊空



■濫濫莊



十八世紀初

我等離開貧苦介原鄉嘉應州

為了絡食，同阿爸阿母道別

留下目汁同越行越沈重介心事



渡海來台介時節

台南一帶已經有泉州漳州人開發仔

再也尋毋到著腳介地跡

我等祇有跈等

下淡水河一路南下

蓋像分麼介命運帶等

一步一介腳跡

慢慢仔行入荒涼介高屏平原

我等知得從今以後

客家山歌會適這響起

同原鄉介父老兄弟對唱



經過千辛萬苦

我等尋到一塊地來安頓自家

這下正有時間

偷偷仔整理痛苦介心事

恬恬去聽命運進行曲



這塊分我等生活介地跡

由於地勢低，一落雨

就氾濫成災泥漿亂竄

蓋像想愛將我等驅出這地跡

毋過我等介硬頸精神毋會放過我等

我等一面唱山歌

一面將家園適泥漿底肚撈起來



● 掛紙



有人傳說，我等失落介祖墳

就佇該片恁遠山頭

分一大片像雪樣介蘆葦，冷冷囥等



我等毋願這淨係一個傳說

故所佇清明這一曰

我等成群結隊扶老帶細

去翻開，讀識

該神秘不可測介山頭



無增差，毋管像雪樣介蘆葦

有幾多深幾多冷

我等定著用子子孫孫介

體溫，去燒暖

分長年冷冷囥等介祖墳