路

路四首
-記宜蘭花蓮四個所在
邱一帆


路之一－蘭陽博物館
（lu ziiˊidˋ－lanˇ iongˇ bogˋvud gonˋ）

造型在烏石
co hinˇ cai vuˊsag
祖先開墾个影跡
zuˋxienˊkoiˊkienˋge iangˋjiagˋ
用細細个模仔雕刻
iung se se ge muˇeˇdiauˊkiedˋ
就做得道嘆
qiu zo dedˋto tan
宜蘭个靚
ngiˇlanˇge jiangˊ
毋使加講幾多
mˇsiiˋgaˊgongˋgidˋdoˊ
看就知
kon qiu diˊ
連天接地个風華
lienˇtienˊjiabˋti ge fungˊfaˇ
對樓頂到樓下
dui leuˇdangˋdo leuˇhaˊ
從天頂到海底
qiungˇtienˊdangˋdo hoiˋdaiˋ
你會知自然仰般形成
nˇvoi diˊcii ienˇngiongˋbanˊhinˇsiinˇ
你知得人文仰般出世
nˇdiˊdedˋnginˇvunˇngiongˋbanˊcudˋse
實疊个風景
siid tiab ge fungˊ ginˋ
闊闊个歷史
fadˋfadˋge lid siiˋ
來──行一路來看
loiˇ──hangˇ idˋlu loiˇ kon
目珠做得看著个樣相
mugˋzuˊ zo dedˋkon doˋge iongˋxiong
來──圍一圈來聽
loiˇ──viˇidˋkienˊloiˇtangˊ
耳公做得聽著个聲音
ngiˋgungˊ zo dedˋtangˊdoˋge sangˊimˊ
就在自家
qiu cai cii gaˊ
踏著个地泥面
tab denˋge ti naiˇmien
就在自家
qiu cai cii gaˊ
承起个天頂高
siinˇhiˋge tienˊdangˋgoˊ



路 之二－七星潭（lu ziiˊngi－qidˋsenˊtamˇ）

行出涼沁沁个遊覽車
hangˇcudˋliongˇxim xim ge iuˇlam caˊ
行入熱fag fag个海脣
hangˇngib ngied fag fag ge hoiˋsunˇ
無想停跎个腳步
moˇxiongˋtinˇtoˊ ge giogˋpu
停留在海脣
tinˇliuˇcoiˊhoiˋsunˇ
看海面項个揚尾仔
kon hoiˋmien ge iongˇ miˊ eˋ
逐著浪花
giugˋdenˋlong faˊ
無想停跎个目珠
moˇxiongˋtinˇtoˊge mugˋzuˊ
停留在天空
tinˇliuˇcai tienˊkungˊ
看停機坪个戰鬥機
kon tinˇgiˊpiangˇge zan deu giˊ
飛入藍天
biˊngib lamˇtienˊ

行出熱fag fag个石頭路
hangˇcudˋngied fag fag ge sag teuˇ lu
行入涼沁沁个海水中
hangˇngib liongˇ xim xim ge hoiˋsuiˋzungˊ
心情同浪花走相逐
ximˊqinˇtungˇlong faˊzeuˋxiongˊgiugˋ
拈隻石子
ngiamˊzagˋsag ziiˋ
跈著水漂仔
tenˇdenˋsuiˋpiu eˋ
離開路面
liˇ koiˊlu mien
飛向遠方
biˊhiong ienˋfongˊ
飛入自由个所在
biˊngib cii iuˇ ge soˋ cai




路之三－六十石山（lu ziiˊsamˊ－liugˋsiib sag sanˊ）

該年日本人上啊來
ge ngienˇngidˋbunˋnginˇsongˊ a loiˇ
毋使問過老山神
mˇsiiˋmun go loˋsanˊsiinˇ
斬下千年古樹
zamˋhaˊqienˊngienˇguˋsu
運轉內地起神社
iun zonˋnui ti hiˋsiinˇsa
脣頭个樟樹
sunˇteuˇge zongˊsu
順續倒下
sun sa doˋhaˊ
焗做樟腦油
giugˋzo zongˊnoˋiuˇ

該年中國人上啊來
ge ngienˇzungˊguedˋnginˇsongˊa loiˇ
毋使問過地基主
mˇsiiˋmun go ti giˊzuˋ
斬下百年老樹
zamˋhaˊbagˋngienˇloˋsu
運到碼頭換現金
iun do maˊteuˇvon hien gimˊ
脣頭个樟樹
sunˇteuˇge zongˊ su
加減倒下
gaˊgamˋdoˋhaˊ
換包大麵食
von bauˊtai mien siid

該年雲林人上啊來
ge ngienˇiunˇlimˇnginˇsongˊa loiˇ
開田種芋種蕃薯
koiˊtienˇzung vu zung fanˊsuˇ
汗流脈落六十山
hon liuˇmag log liugˋsiib sanˊ
傳種梅山金針花
conˇzung moiˇsanˊgimˊziimˊfaˊ
花開大地出頭天
faˊkoiˊtai ti cudˋteuˇtienˊ

光光个山頂高
gongˊgongˊge sanˊdangˋgoˊ
看毋著千年个大樹
kon mˇdoˋqienˊngienˇge tai su
淨留下路脣个茄苳樹
qiang liuˇhaˊlu sunˇge gaˊdungˊsu
見證
gien ziin
光光个山頂高
gongˊgongˊge sanˊdangˋgoˊ
金針同星光共伴
gimˊziimˊtungˇsenˊgongˊkiung panˊ
照亮六十石山个逐條
zeu liong liugˋsiib sag sanˊge dagˋtiauˇ
山路
sanˊlu



路之四－Shakadang步道（lu ziiˊxi－Shakadang pu to）

行入
hangˇngib
陡崗石壁穿過个路
denˇgongˊsag biagˋconˊgo ge lu
斷崖同峽谷共生
tonˊngaiˇtungˇhiab gugˋkiung senˊ
淺灘同深潭共存
qienˋtanˊtungˇciimˊtamˇbin sunˇ
樹葉遮日
su iab zaˊngidˋ
流水送風
liuˇsuiˋsung fungˊ
腳步無想向前
giogˋpu moˇxiongˋhiong qienˇ
乜無想愛離開
me moˇxiongˋoi liˇkoiˊ
頓恬
dunˋdiamˊ
在這位
coiˊiaˋvi

看山林
kon sanˊlimˇ
映入夢中
iangˋngib mung zungˊ
聽流水
tangˊliuˇsuiˋ
流入心田
liuˇngib ximˊtienˇ
鳥仔緊唱緊傳
diauˊeˋginˋcong ginˋconˇ
蝶仔緊飛緊舞
iag eˋginˋvuˋginˋbiˊ
Batto族人在這位
Batto cug nginˇcoiˊiaˋvi
唱自家个歌仔
cong cii gaˊge goˊeˋ
跳自家个舞蹈
tiau cii gaˊge vuˋtoˊ
講自家个母語
gongˋcii gaˊge muˊngiˊ

行出
hangˇcudˋ
陡崗石壁穿過个路
denˇgongˊsag biagˋconˊgo ge lu
無想著恁遽
moˇxiongˋdoˋanˋgiagˋ
頭犁犁
teuˇlaiˇlaiˇ
有路無方向
iuˊlu moˇfongˊhiong
心酸酸
ximˊsonˊsonˊ
有心無力量
iuˊximˊmoˇlid liong

＜台灣客家語拼音方案＞標注「苗栗四縣腔」



-------
邱一帆。苗栗南庄人，1971年在小南埔出世，1994年轉來南庄國小服務，有閒時節，致力客話文學个創作同推廣，同時參與社區个工作。成時，三更半夜硬硬睡毋得，會dang-dang項起來，直直到天光，思想教育、南庄、客家同台灣个未來。