范文芳--＜娘婆个故事＞

古時代个平頭百姓

就像菅草一般無價值

古時代个詩人

也識感嘆菅草開白華

開荒个台灣人

將草菅頭挖起來開田

不知情个台灣少年

將滿山芒花當做春江蘆葦

家鄉个父老

將芒草喊做娘婆

嫩个割來分牛食

老个割來蓋屋頂

家鄉个父老

將芒花喊做娘花

阿爸割下花梗紮掃把

阿娘拿起娘花掃地泥

娘花無像桐花恁雪白

佢有一兜蒼茫

娘花無像也將恁香氣

佢有一身草味

娘花無像牡丹恁華麗

佢有一息个強韌



台灣人个命運

就像菅草

在燥乾乾个山崬頂

拼命盤根生芽

農家人个命運

就像娘婆

在十一月个山風中

硬撐佢个艱苦

客家人个命運

就像娘花

在蒼茫个暮色中

徘徊觀望