倒

倒糞埽 

【林沈默】

    　少女的祈禱，

    　愈吱愈大聲。

    　緊！緊來去，

    　咱做伙來去倒糞埽。

    　料理日常糞埽，

    　第一層是分類工課：

    　可焚燒、不可焚燒，

    　可回收、不可回收。

    　世間的糞埽萬百款，

    　哪是簡單分會清楚？

    　枝頭落葉，

    　會使做肥底，

    　化作春泥更護花。

    　心頭落葉，

    　可比保麗龍，

    　糾糾纏纏死袂爛。

    　孝子亭，

    　無風翹翹倒。

    　枕頭山，

    　床前冤床底和。

    　跋落囝兒坑，

    　勞碌碌當快樂樂。

    　人在江湖，

    　義理惹災禍，

    　刀光劍影相報。

    　人倫孝道，

    　親情酒變醋，

    　毋知佗位失錯？

    　新烘爐惜新茶鈷，

    　燒柴添火全撇步：

    　滾熱了某囝、

    　冷落了公婆。

    　我是老雞公，

    　你是新雞角仔。

    　咱佇公園角落，

    　啼叫三明治之夜，

    　倒盡風塵的糞掃。

    　北風冷嗦嗦，

    　吹散鬱卒的頭毛、

    　吹熄閃爍的星河。

    　不過，糞掃摒了，

    　順著月眉暗示的路，

    　咱攏是要乖乖回轉去，

    　安搭厝內彼隻水◆雞母。

    　人生糞埽，

    　糞埽人生。

    　風風波波，

    　也無可奈何：

    　清了今日糞埽，

    　猶有明仔載的糞埽。