地泥

橡棋林个故事(一)
◎范文芳
話頭
裏篇文字，係講一處客家莊，現下安做竹東，頭擺在地人喊佢橡棋林，地方誌書个記載，官方稱呼佢樹杞林。𠊎想愛用現代知識，裏隻客家莊个歷史、地理、人文，學習佛教个方便法門，暫時借用漢字來書寫，語言本質係台灣客家話，文章形式係章回小說。

第一章 台灣个歷史
受漢文化教學个影響，在台灣島上个居民，大部分有腳下幾點錯誤个認知摎認同：
1. 台灣个歷史無超過四百年。其實裏種講法，係企在中國漢文化个立場，第一種誤解，講「歷史」窄化為「人个歷史」，第二種誤解，將「人」窄化為「漢族」。
2. 台灣係化外之地，野蠻人奈有麼个文化！
為了講清楚台灣个歷史，𠊎必須分幾下回來解說。

第一回 地泥个歷史
台華語常用「土地」一詞，台福語慣用「土下（音ka）」，台客話慣用「地泥」。
頭擺頭擺，大約一千萬年前，地球識發生當大个地殼變動，台灣島從太平洋西側凸起來，經過長時个火山爆發，正慢慢穩定下來，從外表看出中央山脈、雪山山脈、海岸山脈，從地表看出高山有四千公尺，大條个河壩從縱向个山脈向東西兩片奔流。
裏隻海島，從南到北，大約四百公里，從西到東，大約八十公里，最南端算熱帶氣候，其他地區算亞熱帶氣候，在太平洋个洋流經過台灣島再往日本、高麗流過去，帶來季候風、雨，在太平洋西岸有火山斷層帶，台灣也不幸常透會發大水、發風災、還有大地動。不幸之中，也有得天獨厚个好處，有高山縱谷、有河流海洋、有充沛个雨水、有四季个變化，地泥上个植物動物，地泥下个礦物都非常多樣，難怪葡萄牙人在差毋多五百年前，就用讚美个口氣喊出Formosa，中文翻譯係美麗之島，台福語可譯為足水个島嶼，台客語可譯為恁靚个地方，賽德克語可能就直稱Balay！

第二回 草木禽獸个歷史
有土地、有水份、有日頭，正會產生生命，地球上个生物，可能有十億年个歷史。台灣島有一千萬年个歷史，島上个動、植物，也差毋多有一千萬年个歷史，島上有人類出現，可能無超過十萬年，漢人移民台灣，不過五百年个短短歲月。
台灣島上有非常多樣化个原生種蝶仔、鳥仔、魚仔、蘭花、竹仔、樹仔，經過千萬年个歲月，也有海風、潮流、動物帶過來个外來種，假使水土無合，就會死亡絕種，假使想愛在這處土地生養、定居下來，愛經過調整、適應个過程，正做得生存下來，該就變成台灣種个草木禽獸。
櫻花鉤吻魚變成留在台灣山區个特有魚種，台灣合歡樹係南洋遷徙過來个樹種，最後生个外來種，安做小花蔓澤蘭，已經造成台灣土地上个麻煩！

第三回 臺灣人个歷史
根據科學个推論，人類个先祖，係靈長類个哺乳動物，差毋多二十萬年前，在今下个非洲中部，開始演化出來用兩腳企起來行路、走跳个人種，其大腦个容量，腦部个皮層皺摺明顯比較猿猴、猩猩又過複雜。
裏種新个哺乳動物，又快速演化、遷徙，分佈到歐、亞、美、澳...等地。每一處人類生養个土地，因爭有其特殊个地形、土質、氣候、雨量、溫度，就形成特殊个動物、植物，當然人類也隨著土地、歷史調適其生活方式，千、萬年下來，平平係人類，其身裁、膚色、性情都會形成各色各樣个人種。
台灣島上个人類，有科學根據个講法，大概有五萬年前个Indonisia，其後代就係現下台灣个十過族原住民，大概个推論，Indonisia人係從非洲，經過印度、亞洲南邊，一直遷徙到太平洋各處海島。
人類歷史个十五世紀，有了進步个航海技術，加上認知到地球係圓个，歐洲个白種人，開始回到非洲去殖民，渡海到美洲、澳大利亞、紐西蘭；亞洲个黃種人，也從北向南遷徙。
漢人來台開墾，盡早係十五、十六世紀，該時島上早就有原住民，裏種情況，美國摎台灣有兜相同个歷史。英國清教徒為主个白人，冒險遠渡大洋到新大陸，想愛建立新个國家；亞洲東南沿海个部分漢人，冒險渡海過台灣，也係想愛尋著新个家園，這係移民个本質。英國、法國、西班牙等國个政府，想愛掌控、利用、統治、剝削非洲、太平洋海島、美洲，裏係殖民。漢人、滿人建立个中國政府，對台灣个態度，就像英、法等國對美國、加拿大个態度，係統治、掌控、利用，裏毋係「移民」，裏係「殖民」。
十八世紀以後，美國、加拿大慢慢獨立起來，建立自家个國家，台灣人个歷史就比較衰過，經過荷蘭、西班牙、滿清、鄭經个殖民統治，並無發展出追求獨立建國个共同意識。
滿清政府，因為同日本戰爭失敗，將台灣割讓分日本，裏已經係十九世紀末年1895哩！
日本政府對台灣，本質上也係殖民，假使有差別，就係日本政府用西化以後个現代化觀念，來建設台灣个衛生、醫藥、郵政、交通、教育，裏部份摎傳統个漢人文化、原住民文化有盡大个差別。
經過荷蘭、西班牙、滿清、日本个殖民統治，台灣漸漸形成自家个文化，裏種文化，既經不同於漢人个傳統文化。