阿姆裹粽仔

客語詩

● 阿姆裹粽仔  / 陳寧貴

五月節前二日

我同﹝佬、與﹞細老弟

蹲﹝gu﹞佇阿姆身邊

看伊裹粽仔

阿姆手扳又遽又準

伊將糯米同香料放入粽葉裡肚

蓋像變魔術

變出一粒又一粒

共樣形式大小介粽仔

阿姆裹好三大紮粽仔

再放入大鑊頭去煮

我同細老弟就去屋背搞樹奶﹝橡皮筋﹞

蓋像經過盡久

正鼻﹝pe聞﹞到粽仔介香味

適鑊肚尖出來

細老弟問阿姆--

我介口瀾會流出來咧

奈久正有粽仔好食啊？

阿姆講--

遽囉！遽囉！

愛食好食介粽仔愛先有耐心

粽仔定著愛煮畀透透

正毋會半生熟

正會Q軟好食啦，知無？

阿姆過身後

每擺五月節看到粽仔

我就會愐起阿姆講過介話

這時節粽仔恁熟識介香味

毋知適奈

緊尖入我介心肝底肚