台客語秋鬥會

阿堂哥發明「台客語秋鬥會」，非常炫，却有些驚聳，令人「胆胆大，愛收驚」，其真實内涵是，往昔客家鄉親晚飯後聚集在禾埕邊或榕樹下鬥嘴鼓，鬥而不破，皆大歡喜。因時間關係，這次活動設計與來賓互動不足，無法聽聞更多閱讀大眾的見解以突顯客語書寫問題。其實創作者本身也是閱讀者，想起我曾用散文筆調，以客語書寫方式提出一些審思：

●四海大平安
該日，會議結束後，芳慈湊我同前輩詩人葉日松，三儕共下去啉咖啡打嘴咕。葉先生係特別從花蓮尖車來台北，人講風塵僕僕就像恁樣仔，我講，後擺我像佢一般年紀，蓋可能行毋多停動咧。佢拍拍我个肩頭，聲如洪鐘講，毋會哪，你還後生啦。無增差，在台北我做得嚎俏講係先輩，毋過一堵著葉先生，就愛退避三舍，乖乖做後輩咧喲。

當然，三句不離本行，嘴鼓一打，話敘東鬥西杈，又杈歸客家文學推廣問題。我講，客語造字係一個大問題，盡根本个《我， ngai》字，在網路項就行毋通，有人寫崖，有人寫涯，造出个字用毋著，分學習者造成困擾，降低書寫意願。雖然教育部有開發出客語打字軟体，毋過單凈做得印出來，或者在電腦本機運用定定，一到網路就鬥毋著咧。故所客語造字，定著愛考慮網路个流通性，無法度在網路流通个語言，仰般會分人看打眼，分人有主流文學个認同？

再過講著，南客北客用語有息把無共樣，記得無久前，屏東教育大學鍾屏蘭教授喚厥研究生，愛來寫我个作品研究，佢讀過我个作品後講，你个用語蓋像係北客哩。這時節，我正斡頭轉去看自家作品。係呀，你寫「粄圓、輔娘、轉去、恁靚、恁慶、盡好、落水、承蒙恁仔細」，定著係北客；南客會恁樣寫「圓粄、姐﹝妻﹞仔、歸去、恁鬧、恁會、蓋好、落雨、多謝」。北客語較古雅，南客語較現代感。我從南客來，歇久台北無成變北客咧？客家諺語講：《故鄉水甜入心，十年毋改舊鄉音。》正著啊。該日我同葉日松先生講，我二十歲來到台北，現今既經花甲之年。佢講恁樣你待在台北比故鄉還較久囉。係呀，我講，我个他鄉既經變做我徠仔个故鄉咧。我歸去南部故鄉時節，蓋多認毋識个細人仔，斷真係鄉音息把有改頭那毛白，細人仔看著我，愛笑問客從何處來咧喲！

一般來講南客（六堆），受到別族群語言影響較多，「大家、每日、最好、繼續、新鮮」在南部六堆客家庄一哪都會聽著，毋過北客可能會講這兜毋係客家話。一直裡來，任何語言係有生命樣仔，會吸收融合變化，到尾約定成俗，逐儕使用後就欲流行起來。記得還細時節，盡輒講「歐多擺﹝機車﹞、克多﹝外套﹞、嗨呀﹝計程車﹞、拖浪咕﹝衣櫥﹞、妥邁多﹝番茄﹞、喇機優﹝收音機﹞、黑路魅多﹝安全帽﹞、使力霸﹝拖鞋﹞----」，這兜話我等從細就當作客語來講，過大時節正知係日語，又過大時節正知原來係英語。從這知得，天下个語言係混種不斷演化，無原汁原味這回事。南客（六堆）既經將日語、華語、福佬語，直接變作客家話來講，逐儕溝通無誤，早就順理成章咧。這毋係客語特例，世界各種語言都有恁樣混雜進化現象。

研究生乜對我詩肚寫「挲草」提出質疑，講在南部六堆，田坵除草蓋像毋係「挲草」，係「觸﹝蹉﹞田」，我一聽眼前浮出畫面，蓋多婦人家在田坵肚，頭戴笠麻蒙等面，逐儕右手項拿一枝同人胸部高个細竹棍，撐等自家樣仔，雙腳盡無閒，在禾秧間爛泥漿項，緊滑動除草--這係「觸﹝蹉﹞田」。「挲草」就無共樣，係人跪下來用手除草，研究生同我講，這蓋像係福佬人使用个方式。無知北客係毋係乜用這種方式，恁樣除忒田坵禾秧之中雜草？客家詩詞對「挲草」有恁樣个描寫：「兩腳跪落禾頭下，左手挲過右手挲，十指掘到血漬漬，等到挲忒歸坵田，滿面泥膏紅蝦腳。」分人有切膚之痛个感動，農家人有同擔竿恁韌樣仔个耐性，歷練各種天地無情風吹雨打个艱苦，正能在荒涼大地企起來，開枝散葉子孫滿堂。當然乜有恁樣諺語：「有心耕田無心挲，怪得稗兒靚過禾。」喚農家人做毋得偷懶。

毋係研究生佢恁樣講，我蓋可能一生人，毋會去分出「挲草」同「觸﹝蹉﹞田」个差別。經過多年客語書寫後，我既經有盡大感想，曩擺我可能會主張，百分之百統一使用已造好个標準客語漢字，現下我認同「咖啡八十五度最好喝」觀點，也就係講，客語書寫時節，作者做得保留百分之十五个自由發揮，「崖个、我的」做得通用，過再定著愛用一般電腦做得打出，網路好流通个字做標準，這種做法會測試出大眾對客語文字个接受度，避免關門造字，逼人接受个缺點，恁樣方式乜可能產生，毋係客家人乜做得看識客語文現象，對客語文學个推廣有盡大影響，分客語文學過容易行入別个族群同國際社會，真正有立足客家放眼天下个大氣魄。故所，我在「四海大平安」詩中恁樣寫-----

我等个客家語，
有四縣海陸大埔饒平韶安，
腔調有息把差別，
盡像樂音个高低，
堵堵好交織出好聽个歌仔：
四海大平安！

恁親个聲音，
恁靚个話語，
聽著就分我等心頭，
流過一陣又一陣，
燒燒暖暖个溫流。

故所客家話，
毋單淨係一種語言，
同台灣各種語言共樣，
係互相溝通融合，
共心協力發聲來：
祝福台灣！保佑台灣！