跈阿姆轉妹家

跈阿姆轉妹家

記得還細時節，大年初二
日頭還在睡目
阿姆就起床著靚靚
食過朝愛帶我轉妹家

先坐火車到潮州
再轉車去佳冬
大年大節人尖人
尖到車站鬧嘎嘎

蓋像經過盡盡久
正來到外公屋家

熟識个小黄狗盡暢洩過來

尾拍到像電扇緊磨

我脚癢到像分蚊叼

看著外公同姐婆

我講新年快樂萬事如意

佢等笑到缺牙个嘴巴大大

裡肚放等盡多燒暖暖个話

「還遽喔，又加一歲冽

  變到恁高大囉！」

佢等息把皺皺面項

一下間浮出金鬧鬧日花

阿姆同姐婆聊个時節

表哥帶我同小黄狗

去阿舅芎蕉園捉金蛄仔

在園肚草寮看著一副對聯

「春來一钁頭

  冬來一鑊頭」
毋知係麼个意思

歸去屋家定著愛問阿姆

過再要緊个係避入小書房

偷偷算看哪收到幾多紅包