利玉芳客家作品

●瓦窯

熟識 ke 人喊佢瓦窯
這係 ngai 嫁來莊下以後
分 ngai 毋會感覺到生分 ke 所在

祖公留下來 ke 這塊土地
佢識無日無夜在燒自家
燒紅盡多 ke 台灣瓦

現在
屋頂 ke 風景
分溜苔磧等大家 ke 記憶
雖然窯肚 ke 火已經烏黑
Ngai 等莊內 ke 人也無毋記得

薄薄 ke 紅瓦
疊在牆角下任在佢生溜苔
牽牛花手牽手同佢攬緊緊
感覺著佢 ke 手脈文文跳
柳樹也同佢抵日
蓋像聽著佢勻勻 ke 透氣 ke 心

識生產台灣瓦 ke 瓦窯
像三月開得泛紅 ke 木棉花
蓋等台灣紅又紅 ke 土地

●還福

正月迎春接福
祈求風調雨順國泰民安
收冬時節
達到願望也好
得著平安也好
求來季介福 愛還

毛筆將感恩介心
大大字寫到紅紙項
山川毓秀 草木皆春
貴客臨門 春光煥彩
大門口窗仔頂門簾項
宜室宜家 杜馥蘭香
禾埕尾穀倉貼一張五榖豐收
雞棲牛欄豬欄貼一張六畜興旺

灶下傳來廚香百味
甜粄發粄龜粄三牲
借春天一托盤介福氣
收冬就愛做一棚戲歸還大地

●嫁

耳環仔叮噹搖
在我介耳公邊講出嫁介心情
隻隻金指 含著傳統介情愛
首扼仔落在我介左右手
一圈一圈都係祝福
阿爸送我三從四德
阿姑包分我一句話
喚我莫忘祖宗言
雖然蒙等一層濛濛介面紗
我也讀得出
這本沉長介禮數

新娘車背響起嚴肅介落聲
我會珍惜潑出去介這碗水
紙扇輕輕跌落地
阿姆撿起搖清涼
自言自語唸四句

公婆相惜
早供賴賴

客家詩朗讀