邱一帆 / 從族群文化來看意象

客家做為一個族群有其語言、文化上个特色，廣義个文化又包含著語言个部份。英國人類學家泰勒（E.B.Tylor）在《原始文化》所講：「文化係一個複雜个整合體，其係人類做為社會个一員時，所學習著个一切事物。其包括知識、信仰、藝術、道德、法律、風俗，以及任何其他个能力同習慣 。」，落到（套到）客家文化來講，「客家文化係一個複雜个整合體，其係人類做為客家社會个成員時節，所學習著个一切事物。其包括客家个知識、信仰、藝術、道德、制度、風俗，以及任何其他个能力同習慣。」這兜客家文化个內涵，有其客家族群語言來做安名對應，有其客家言語交際、言談行為來做詮釋，這種對應、詮釋最真切、最生動也最能夠引起客家族群个共鳴。這會表現出客家族群看待世界、解讀現象同其他族群無共樣个所在。

每一個族群，看待世界个方式有其無相同个所在，其看待世界个方式表現在文化个各層面，同時反映在其語言底肚，這係一種先驗个講法。舉例來看，客家人講个「黃匏（vong-phu）」、「番瓜（fan-kua）」同holo人講个「金瓜（kim-kue）」、華語人講个「南瓜（nan-kua）」雖然指稱个係共樣个瓜果，但係從構詞來看，其所顯示出來个意思，並無相同：有个顯示其肉色、有个表示其原旦係外來个品種、有个帶有其吉祥个色彩意義、有个表示其出產个位跡，這個例證做得簡單拿來說明，每一個族群就算看著世界上共樣个東西、現象，也有可能有無共樣个看法；共樣个族群無共樣方言系統个人，對待共樣个東西、現象，也可能有無共樣个觀點；外來个事物、現象，行入客家人个視野，也有可產生同其他族群無共樣个解讀，這就係講，每一個族群看待世界个方式會有其無共樣个所在 。族群看待世界个現象，有其無共樣个所在，表示族群解讀世界現象个角度、意義有其無相同个地方，這種無相同个地方，會表現在族群个語言、文化底肚。族群个人解讀「現象」个背後「意義」反映在其生活、文化之中，同別个族群無共樣，假使同其發現、聯繫起來，這就會係族群特有个意象。