透視

黃勁連

資深的，toh是濟歲人。時間leh過誠緊，一目nih二、三十冬過去矣；烏sim-sim的頭毛變白蒼蒼、變白毛仔，實在感慨萬千。咱今a日講的主題是台灣文學的正名，ti政治上需要正名，ti文學上敢需要正名？我感覺m免，因為台灣文學的名足sui，四正四正、無缺點，「台灣文學」chit個名sui kah……！chit-ma是名實的問題，名kah實無一致。一般人的理解，台灣文學toh是台灣人的文學，toh是台灣人用台灣人的語言思考、寫台灣人的思想感情、寫台灣人的身苦病疼、寫台灣人心靈的夢，toh是台灣文學；牽涉著的，上重要的是語言問題，但是有人tiau-kang逃避、閃避chit個問題。最近我有一個好朋友，咱mai指名，ti《台灣日報》「言論廣場」的專欄，toh是an-ne講：台灣文學m是kan-na語言問題。但是我認為，上重要的是語言問題，無語言toh無「文學」：明清時代，台灣人用古典漢文寫文學，日本時代絕大多數用日語思考、寫文學，戰後國民黨時代百分之九十九點五用北京話寫文學，這敢是真真正正的台灣文學？所以文學「正名」的問題走出來矣，時代、時代之間，一種語言反動另外一種語言，殖民語言作家往往反對新的語言主張，in是為少數人、是既得利益者，但是母語運動是為「多數人」――現在、未來濟濟以父母話思考、感受，咱濟濟在地的同胞――這是咱台灣文學正名運動名實核心的問題，是一種一勞永逸的運動策略。誠濟人舉愛爾蘭作反例，講愛爾蘭作家用英語寫文學，所以中國話文（華文）有伊合理性、合法性；其實這是錯誤的，愛爾蘭語欲死tong-haiN已經七百幾冬，但是咱的台語猶無死、猶活跳跳ku-ti廣大民間社會，千萬m-thang豬母牽對牛墟去，所以咱要求：真真正正的台灣文學，是台灣作家以台語所書寫的文學。

●黃勁連（1946- ）


本名黃進蓮，台南縣佳里鎮潭仔墘人。嘉義師專、文化大學中文系文藝組畢業。現任《海翁台語文學》總編輯、金安文教機構台語文顧問。曾任大漢出版社社長、《台灣文藝》與《蕃薯詩刊》總編輯、菅芒花台語文學會創會理事長。獲全國優秀青年詩人獎、南瀛文學獎、榮後台灣詩人獎等。作品具有濃厚的鄉土情，寫出流浪他鄉的心情，對土地的疼惜、父母的親情、人生的體驗、以及社會現實的批判。其詩有強烈的歌謠風，音樂性強烈，適合於街頭巷尾朗讀，老嫗可解；其散文瀰漫著古典風，溫柔敦厚，讀來如飲醇釀。是台語文學運動的重要推手和詩人。著有台語詩集《雉雞若啼》、《偓促兮城市》、《蕃薯兮歌》、《南風稻香》，台語散文集《潭仔墘手記》，中國古詩文台譯台注多種，另有中文詩文集四冊及編選集數冊。