台灣名牌

頭擺人拜天拜地，
拜分子孫好命順序，
現下後生真生趣，
煞力牯哈日哈韓，
哈到無閒睡目，
哈分自家盡沙鼻。

國際名牌來台跌價拍賣，
高貴人輕輕放下身段，
平常人遽遽提高手段，
排佇看無到頭尾列仔項，
無驚又刺又辣介日頭，
晒到像紅面番鴨公，
無論識毋識貨，
有名就好！

佢等講搶買到係賺到，
賺到一身靚鬧鬧，
分人看到目金金！
身價三級跳，
跳到天頂唱山歌。

名牌！名牌！
國際傳名聲，
台灣有出名，
著戴身項，
變做台灣名流？

註：

頭擺：從前
分：給
煞力牯：費盡心思
盡沙鼻：很神氣
著：穿
身項：身上

-----------
台灣客家

台灣客家，
頭擺二三百年前，
開台祖渡過險惡黑水溝，
咬薑啜醋，開山闢地，
適泥漿肚建立起，
安身立命傳宗接代大家園。

台灣客家，
既經勇敢企出來，
毋係台灣社會隱形人，
乜毋係台灣介人客，
佇這地跡落地生根，
頭頂台灣天，腳踏台灣地，
做得講係頂天立地台灣好漢，
同河洛原新住民共樣，
組織成台灣主人。

台灣客家，
愛為台灣前途打拚，
為了將來子孫好生活，
硬程客家志氣高，
相信我等會算分天斷，
甘願過水毋過橋，
愛同原鄉父老兄弟姐妹講：
愐汝一番又一番，
心肝脫得十二層，
毋故歇久他鄉變故鄉，
台灣乜係客家新故鄉。

註

頭擺：從前
適：從
既經：已經
乜毋係：也不是
硬程：剛毅
愐汝：想你
歇久：住久