台語，收賄者Kah自覺

●陳秋白

掌門詩學季刊第57期編輯筆記

台語，收賄者Kah自覺

　　使用台語ê族群是按怎會kah收賄者做對等ê連接，tī這期ê文學台灣〈第72期〉，我讀著曾貴海先生發表ê 2009年「重生的音符─解嚴後笠詩選」ê導讀「自由與命運的謎歌」內底ê「文學的第五現實」論說中關係語言符號使用ê問題時，雄雄佇文章的後面講：「……因此，堅持用自己選擇的語言符號系統做為書面語言是正確的方向，但是它不具有否定其他符號系統的生產作為台灣文學的功能性與正當性，不然為什麼選舉行為中收賄者使用的大多數是台語符號系統，卻是傷害台灣主體的話語實賤，這種反證應該非常清楚。」。

　　台灣目前ê語言族群，除了日本殖民時期超過75%歸屬日本人編ê「台灣話讀本」俗稱「台語」ê母語使用人口以外，iáu包括客語，原住民…..等等相對少數ê母語族群語言符號系統ê使用者。我想曾貴海先生文章內底講ê選舉時代，應該是指中華民國流亡政府國民黨tī台灣所辦ê選舉。伊講ê話，我想無ê是曾貴海先生用「不然為什麼選舉行為中收賄者使用的大多數是台語符號系統，卻是傷害台灣主體的話語實踐」，來反證台語符號系統的族群「否定其他符號系統的生產作為台灣文學的功能性與正當性」ê道理是啥？假使這是事實，按呢曾貴海先生是毋是認為佇相對少數族群ê客語族群庄頭，籬笆內講中國各種無kāng語言ê新住民kah原住民部落，hām學會曉台語ê其它母語族群，就無曾貴海先生對使用台語符號系統ê族群，所指控hit種接受賄選ê選舉行為嗎？

　　台灣目前母語寫作ê人口，比起有in家己ê母語符號煞用北京語俗稱「華語」做符號系統寫作ê人口來比，會使講是少kah看bē著影。m̄過這佔多數人ê台語母語族群中，產生ê少kah看bē著影ê台語作家，煞愛去phāinn曾貴海先生所指控ê反證。這種對台語作家ê曾貴海風格ê反證指控，我誠好奇毋知笠詩社內底濟濟以台語做母語認同ê詩人，in ê心內有啥感想？

　　某一種語言會受政治力作用，成做優勢語言這是事實。毋閣我心內想ê是，這種所謂政治力，也可能是作家佇家己ê心內起造ê一堵準備無欲hōo家己hānn過ê虛幻ê牆爾。我發現愛提政治力來做藉口ê人，in足愛講Neruda kah Milosz，in講Neruda詩ê「遼闊澎湃」，講「時代的現實感」，講「歷史的精華」，講「奉獻給自己的家國」。毋閣真實ê Neruda到底是啥款ê詩人呢？啥物是Neruda呢？Neruda伊認為伊一生得著ê上重要ê獎，是tī硝酸鹽礦場，hit个對炭坑爬出來伸出粗pê-pê，頂面像深刻著彭巴草原地圖ê手ê炭工對伊講ê話：兄弟，我已經熟似你足久—ah。而且頒獎場合是tī吹著刺骨冷風，tī智利ê星見證ê暗暝，Neruda對炭工in講：lín無孤單，有一个詩人一直關心著lín遭受ê痛苦。─〈from p. 171, My Country in Darknes, Memoirs, Penguin Books 〉。真實ê Neruda，一遍閣一遍藉著詩kah上下階層ê人民對話。In也足愛kā波蘭詩人Milosz寫關係〈我ê忠實ê母語〉ê名言提出來tī海外ê場合講，講啥物母語是我ê祖國，若無你我算啥。毋閣in攏無像in引用Milosz講ê，忠實去實踐in ê母語，in攏bē像Milosz謙卑自稱家己是用無人聽過ê話咧寫詩ê人：

　　　　Wrong Honorable Professor Milosz
　　　　Who wrote poems in some unheard-of tongue.
　　　　　　　　　　─A Magic Mountain, Czeslaw Milosz

　　台灣ê母語寫作運動已經幾落十冬，準講照一般講法ê本土政權去推算，對李登輝先生做總統ê時代，到陳水扁先生做總統ê八冬，鬥鬥嘛有二十年ê時間。這上少二十年ê時間，究竟包括笠詩社kah有in家己ê母語背景，自認是台灣作家ê人，佇in ê作品中到底自我實踐外濟ê母語寫作成就。政治力影響教育是主動力ê作用，媒體kah作家對語言ê使用嘛是主動ê行為，當然媒體kah作家也會使將使用非母語語言ê主動行為講做是一種「不得不」ê作法。媒體考量ê是閱讀ê市場，這是典型ê資本者行為。毋閣當多數ê作家攏自覺欲照家己ê意志出版家己ê母語文學ê時陣，這種力量敢無法度逼使毋管是任何政黨執政ê語言政策。作家無應該替家己tshuē樓梯去落，按呢正義敢毋就是我囡仔時tī電台放送ê〈江湖夜雨十年燈〉ê武俠故事中，聽著ê hit位手提燈火ê盲劍客ê感慨呢！