客語作品

發揚客家環保精神救地球
左春香

這下个時代毋比得頭擺，頭擺人个價值講2B，愛看你駛麼个車仔，Bens也好，也係Bmw；這下人个價值係2V，兩個「V」，一隻V係「vision」－觀點，一隻V呢？就安到「value」－價值。所以講enˊ這下這隻題目講愛「發揚客家環保精神共下來救地球」，ngaiˇ就從這兩个觀點來講，一個係地球發病了，一個重點就係「客家文化」「客家精神」到底有哪个環保个力量、環保个內涵，做得來挽救地球，來做到這種價值。
恩知得恁多年來，美國紐澳良發生颶風，結果引起大水災，幾千个人無好歇、無好戴、無好食，愛靠別人來救濟，enˊ臺灣个慈濟功德會乜有去做救濟个行動；還有印尼、還有日本、還有甚至於enˊ臺灣發生大水災！恁久以來，正經enˊ个地球發病了！連細細仔个小學生乜知，講麼个地球頂背个「臭氧層」爛忒了；講麼个「東京議訂書」全世界開會，大家來討論「節能減碳」，愛來救恩个地球。係呀！這係一隻大个問題呀！這係地球公民个問題呀，恅客家人有麼个關係呢？
講實在，有一擺，兩三年前了，ngaiˇ看到一個電視節目盡感動！該節目个主角戴楊梅一帶，阿公阿婆係客家人，爸爸媽媽尞日時帶子女轉去遶阿公阿婆；原來呀，佢兜个屋下鑊仔還用柴仔來煮水；過來呢，還用大鑊頭蒸粄仔，去園仔摘水果、剁柴仔，該種等等等等生活个情形，透過「大愛電視台」个節目播出來，有影喔！其節目中多少仔還有講客家話，我心肝度就愐：「enˊ客人恁環保！仰有恁好个節目？」
過仔還有一个例仔，恁多年來，各位好朋友一定有聽過「荒野保護協會」（環保教育行動團體），這「荒野保護協會」在全球已經有幾下十個據點；這「荒野保護協會」个創辦者係麼人呢？佢安到「徐仁修」，「徐仁修」又係麼人呢？「徐仁修」係enˊ客人，enˊ客家朋友！
所以講奇怪，這兩點个消息，兩點个例仔，分ngaiˇ愐到講：「咦？客人同環保有大大个關係呢！」後來，enˊ去參加進修，去看到書上正講這下「客家研究」已經變到時行个事情了，到底enˊ「客家文化」有麼个「核心價值」呢？比將講enˊ客人「盡食苦」、「盡擔硬」，麼个較苦个頭路就係enˊ客家人去做；過仔enˊ客家人又盡有一種「多元包容」个精神；最重要个係因為幾下百年來，enˊ客家人在原鄉，在廣東个山區也好，在福建个山區也好，贛南个山區也好，因為長期同山林共下，所以講「逢山必有客」，客人就係山个族群，恩客人同「山」「林」「自然」已經相處恁久了，有佢一定个價值、有佢一定个方式。
原來呀，enˊ客人不論係食个、著个、行个、也係歇个，佢就同環保盡有關係呀！講食个好了啦！恩客家話有一句話講：「食多無香味，取飽就好。」enˊ冬下時節多出來个蘿蔔仔、大菜，拿來滷、去曬，做出來个客家美食，在這下个時代，毋單只客人盡好，這下外族群愐到最好最xiangˇ其个就係「客家美食」。你講著無？所以講，enˊ有這樣个環保精神个食个精神，這係第一點。過仔，第二點著个：像這下ngaiˇ著个這樣个衫係改良式个「藍衫」；「藍衫」係取字於植物啊！這個植物安到「大藍」，「大藍」取下來後，用其汁來染，染出來个色係藍色也好、烏色也好，就係深色！做麼个愛深色呢？因為簡單、耐洗、又耐著，染出來个布仔、做出來个衫去做事時節無驚褪、無驚嚕、洗毋會壞呀，就係恁樣仔情形。還有呢？還有講到建築方面，enˊ老屋下个建築盡通風啊！
故所講，enˊ在推行客家事務个各位好朋友，知得enˊ客家人就有環保个精神，不管食、著、行、歇，就有這種个優點，enˊ毋使客氣（行動就著了！），做一个好个客家人，共下來救地球，這就係最好个價值，這就最高个觀點。因為enˊ在這地球當中，係世界个公民，enˊ客家文化永久就毋會滅亡！
----------------------
《文學客家》第2期邀稿
----------------------
●請用客家話來寫
一、客語詩歌、散文、小說、戲劇。
二、有關客語文學?隨想、雜感、札記。
三、有關台灣客語文學?論述。
四、客語書評、短評、自由論壇。
五、客語文壇活動、文獻史料。
六、截稿日期：2010年 5月底。

主 編：邱一帆
353 苗栗縣南庄鄉東村文化路3號
E-MAIL：tu6986@webmail.mlc.edu.tw
郵政劃撥：帳號16686525 黃子堯帳戶
新莊市民安西路245巷10弄9號
hakka_taiwa@yahoo.com.tw
（平裝）每期定價：新台幣140元.