客語作品

●紙雕展覽　　江嵐（gongˊlamˇ）
　　正月柚花開到像白雪，二月蒔田个時節，三月木棉花開到像火燒天，四月細柚子打到結結，天時當好，出去曬日頭順續尋兜靈感來寫文章。
下晝去總爺藝文中心看紙雕展覽，有日本武士精神个作品，乜有藝旦个故事，有戰爭也有家庭溫馨个，還有各種動物形投佬台灣老頭擺个生活，大大細細个紙雕，分人看到當感動。
　　其中看著高麗惠小姐个作品，佢用無用个廢紙，定定仔畫圖、裁剪，細心細意做七、八隻月，正做好个作品＜快樂的樵夫＞，分啀盡感動。一個庄下男仔人，著一身灰青色个粗布衫，赤腳嫲搭，褲腳攝到半天高，肩頭核（kaiˊ）等一擔柴，企就毋正，看起來拗蠻仔重樣仔。原文係恁仰寫个：
　　　　快樂的樵夫　　高麗惠
　　這是我這兩天才完成的作品，雖說是最近，其實斷續也拖了七、八個月了！七、八個月前就設定了他是快樂的樵夫，臉都做好了，卻不知該快樂啥？心態吧……這幾天大病一過才知道，簡單就是快樂，平凡就是幸福！即使只是一擔柴，挑回家却能換得熱騰騰的一頓溫飽。妻子的笑容、孩子的稚語，這就是幸福，就是滿足！加把勁兒用力的站起來吧～！孩子們～爸爸回來了～。
　　
　　人生，有一餐好食就滿足矣，還使計較麼該？
　　該兜無被好蓋，無飯好食个人，又係仰般過日仔个喏？
　　看著這個紙雕作品，有幾分多愁善感个同理心，心肝發糾筋。堵堵這央時，　　　　　　　　　　　　有一陣坐遊覽車來參觀个人客，在吾身邊行過去，大家就緊訶腦這兜恁幼路紙做个人公仔，衫褲做著恁靚，色目乜當講究，面項有無共樣个表情，手腳幼秀，看起來像真經个樣仔，還得人惜，還會做哪。
　　逐擺看展覽，啀總係愛看一、兩點鐘久，顧展覽館个小姐當有責任，緊走入來看啀還有在展覽館肚項無，這位禁止弇相，其實啀也無弇相機，自從弇相機壞忒以後，一直無好用。雖然講對啀這種，一日到暗走文化古蹟个人來講，無弇相機盡無方便，下把仔一日走幾下位，還有幼路个雕刻樑柱老屋，頭腦記毋得幾多。故所在這位慢慢仔欣賞，定定仔看，相信雕塑家乜會歡喜啀這種參觀个人客正著。難得來一擺，無看真仔仰會對得起啀一日个時間。
　　行出紙雕个世界，開始欣賞這棟日本式个老屋，一格一格个窗仔門，彎彎斡斡个巷路，這位係台灣糖廠盡高个指揮所舊跡，這棟係社長个宿舍，彎彎斡斡个設計有當多機闗，玄關入來、係人客廳、會議室、間房、灶下、還有秘密个內廳。在廳下个雪窗看啊出去，一隻窗門就有一幅風景，庭園整理到當典雅，看著這種恬靜个景致，心肝就會定落來，這位係修心養性个好所在。還有特別衝高起來个地板，下背係台南六甲盡有名个大垤紅磚，歸百年來毋會風化，色目紅豪紅豪當溫柔个靚，這係為著愛提防濕氣設計个。台灣紅檜地板整修个時節有漆一層亮油，工作人員拭到金金淨淨，自然个樹紋線條逐垤就無共樣，就像係企佇一座森林肚項，分人試到安靜到心平氣和。
出到玄關，堵到服務小姐問啀：「你怕當合意這兜紙雕呵，看你看著恁入文又恁久，當有心。」啀禮貌上笑笑仔講：「係啊！」佬佢行一個日本式个九十度鞠躬，就行出去矣，小姐在後背傳來有兜仔噂个聲，掩等嘴細細聲仔講：「哇！啀顧恁久个展覽館，毋使受著恁有禮貌个對待，還感動哦！」。啀毋知愛仰般回應，詐意仔無聽著，就行出這間古色古香个日本老屋。
　　庭前日本時代留下來个榕樹、樟樹、牛眼樹，青油油分日頭晟到發光，門碫下个草皮入軟，行佇頂高當舒爽，柔柔个日頭花仔無異熱，當堵好散步行轉去，順續一路摘兜烏鈕仔草，暗晡夜好煮湯。