序《白話字文學》---- 李勤岸

台灣文化kap語言、文學ê互動

--序《白話字文學》

• 由 李勤岸 在 2010 九月 13 的 7:00pm 張貼
• 發送訊息 檢視 李勤岸 的部落格

台灣文化kap語言、文學ê互動
--序《白話字文學》

李勤岸

蘇東坡晚年，自題金山畫像，講伊:

心似已灰之木，身如不繫之舟。
問汝平生功業，黃州惠州儋州。

我60歲，父親節彼工，忽然間心臟中風 (心肌梗塞)，雖然現代醫學進步，有才調用心導管手術，將我ê性命救轉來，我家己mā真清楚已經來到晚年。心肝雖然猶未親像「已灰之木」，總—是這个身軀已經是親像無縛索仔ê一隻艋舺(獨木舟)，輕báng-báng，漂流tī茫茫大海，隨時會沉落去ah。若beh問我平生功業，當然是無lah，若是問我平生志業，我浮出來ê毋是東坡式苦楚、反諷ê地名，我浮出來ê是語言、文學、文化三項。

做一个語言學者，我ê專業是理論語言學，m̄-koh我上興趣ê卻是kap語言學有交插ê領域，譬如講社會語言學、文化語言學、kap 文學語言學。若看我ê冊房藏書差不多就了解ah，我ê冊除了我專業ê語法、詞法、語音、聲韻ê冊以外，大多數ê冊攏是kap文學抑是文化相關ê，koh有一大堆是冊名著直接有語言、文學、文化這三个詞tī內底ah。Ah我教冊ê單位竟然號做「台灣文化及語言文學研究所」!

白話字文學，要緊是白話文學。透過白話字ê書寫，咱台灣文學ê白話文學竟然比中國白話文學較早33冬就開始，這是研究台灣文學ê學者一向毋知ê史實。因此，白話字文獻thang講是咱台灣真重要ê文化資產，m̄-koh長期來無予人對重，攏予人囥tī壁角坱埃、生菇。我雖然tī台灣生長、受教育，卻全然毋知影咱有這項寶貝。一直到我第二遍出國留學，1995年，去Houston 參加第一屆北美洲台語文夏令會 (後來改名世界台語文化營)，看著哈佛圖書館副館長賴永祥長老所報告ê白話字文學作品--1920年代鄭溪泮、賴仁聲ê小說，大驚一tiô。後來，我就立志beh予台灣人攏知影這个寶貝。我 ê博士論文就運用遮ê資料來kap 現代ê台語小說做詞彙比較。後來我ê國科會研究計畫攏kap白話字文學有關，特別是最近三冬所主持ê《台灣教會公報白話字數位典藏計畫，1885~1996》，將這个寶貝數位典藏，成做「台灣白話字文獻館」網站。這个計畫已經結案，國科會認為遮ê文獻非常寶貴，決定beh kā永久保存，mā已經開始進行作業ah。

這本冊有七章，攏是我做白話字研究計畫中間所寫ê。 有ê是較全面tik論述ê (第1章是台灣教會公報及其數位典藏，第7章是北部白話字月刊〈芥菜子〉)，有ê是針對某一个文類所寫ê。 有運用語料庫語言學ê電腦輔助分析法來做ê，親像第3章〈賴仁聲白話字文學ê跨語言現象〉kap 第6章〈白話字文學ê文化現代性〉，mā有較傾向文學討論ê，親像第4章〈蔡培火白話字散文《十項管見》ê關鍵〉。Mā有特別探討台灣人愛情、性、婚姻觀kap人格特質ê，親像第2章〈白話字小說中呈現ê台灣人形象kap文化面貌〉。我tī博士班有開一門必修課「認知、語言及文化」，第5章討論語言文字kap 國家認同就是運用文化語言學ê語言相對論來探討ê。整體來講，攏是透過白話字文學ê文獻資料，運用語言學ê方法來做文化研究。

咱講白話字文獻是咱台灣人ê重要文化資產，是咱台灣文化ê大寶貝，咱就ài好好仔來利用，會使做文學研究、語言研究、文化研究，mā會使親像我ê做法，研究這三項之間 ê 互動，予咱對台灣文化有koh 較闊koh較深ê了解。