尊重無共樣个客語講法

邱一帆
尊重無共樣个客語講法

在台灣，客家至少有五種以上輒常聽著个客家話：四縣、海陸、大埔、饒平、詔安，簡單記做「四海大平安」，其實還毋只恁多。

每一種客語腔頭，有其獨立个語音、語彙、語法同語用，千萬毋好用自家个腔頭做唯一个標準，來講別人講个客話無標準！南部四縣講「蓋鬧（koi nau）」，北部四縣講「當靚（tongˊtsiangˊ）」，海陸腔講「當靚tongˋtsiangˋ」；詔安腔講「一半擺」，大埔腔講「成半下」，四縣腔講「下把仔」.....。

在四縣腔同海陸腔混合使用个地區，「食飯」，就有四縣聲調个「siit fan」、「shit pon」、「shit fan」、海陸聲調个「shitˋ pon＋」、「shitˋ fan＋」、「siitˋ fan＋」恁多種無共樣个講法，每一種就有人講，這無麼个著抑係無著个問題，應該尊重每一種無共樣个幾法！

還有，無緣無故，無愁無慮个無，在四縣有「vuˇ」、「moˇ」兩種講法，這就像文讀（讀書音）同白讀（講話音）个差別，讀書音有可能入到講話音，講話音乜有可能變到讀書音，講「 vuˇ ienˇ vuˇ gu」、「moˇ ienˇ moˇ gu」應該通得；講「 vuˇ seuˇ vuˇ li」、「moˇ seuˇ moˇ li」應該乜使得！