客語童詩

 ●等路  / 陳寧貴

該朝晨，我等三姊妹

在大禾埕盡暢搞聊

緊相驅緊唸

「阿啾箭，阿啾唧，

上背伯婆做生日，

愛分我去抑毋分我去，

害我打扮兩三日------」

突然間

睞到一張車仔停在屋家門口

我等趕遽走歸去

看到歇﹝hei住﹞在大都市介阿滿姑

手項攬著大包小包

適﹝Di從﹞車肚尖﹝擠﹞出來

阿滿姑打扮盡靚

嘴唇漆紅紅

遠遠就鼻到伊身項香香味緒

伊像一蕾在院仔肚

當正開介大紅花

我等大聲喊

阿滿姑！阿滿姑！

伊用力摸我等介頭那

笑笑講：恁會大哩，

會認毋識汝等咧喲！

伊入屋肚

打開大包小包介寶貝

裡肚有好食介糖仔、好搞玩具

阿滿姑發分我等

我等歡天喜地接過手

黏時﹝立即﹞像牛嚇獵﹝牛奔﹞走轉大禾埕去搞聊

當晝定著有豐湃晝餐好食囉

阿姆煮盡多

平常食毋到介菜請阿滿姑

害我食毋知飽

肚司撐到像大山

阿滿姑轉去後

又害我幾下暗晡發夢

夢到伊又坐車仔歸屋家來

還鼻到伊身項

盡香盡香介味緒