詩想起 ●原鄉

●老伙房

三十年前，
我離開老伙房介時節，
大禾埕一群細人仔，
佇該歡天喜地走相逐！

三十年後，
我滿心期待歸去老伙房，
無愐到看著介係，
大禾埕一群禾畢仔，
佇該興咋咋打嘴鼓相吵事！

該兜走相逐介細人仔，
到底逐去哪位也？
仰會存到禾畢仔，
歇佇老伙房？
---------------------
詩想起 ●原鄉

心肝肚總係囥等
一個緊停動介秘密
像火焰虫介光眨動
緊尋前世介記憶
霧霧介意象
也像半夜突然出現介一群咳嗽
嗽醒身體深處
彎彎斡斡介桃花源

既經夢遺介另一介世界
流連在虛幻介神話肚
隔著一層放大介朦朧
檢查人間介滄桑