有一條路

有一條路
張芳慈客語詩作

總好企在轉斡介所在
迴頭看行過介路
行過介彎彎斡斡

　目珠瞇瞇也使得
　看得到心肝肚介一條路
　該位所盡多歡喜
　阿姆牽等吾手
　我牽等老弟介手
　一片係大陂塘
　一片係田秧

　目珠瞇瞇也使得
　看得到心肝肚介一條路
　該位所滿滿介膽識
　阿爸肩頭揩等弓蕉
　聽我大聲唱歌
星夜中芒冬花輕輕拂等　　　
　我含等目汁介面

　有一條路啊
　別儕人可能毋識看過
　頭擺識有介山林
　頭擺識有介竹埔
　庄頭伯公廟介後背
　傳出山歌介老屋
　
常透我會愐起
　心肝肚介該條頭擺介路