邱一帆/客語文學大步向前行

客語文學大步向前行

事實上，逐個語言个形成係俗成个、係民主个；比對逐個語言个內在系統，係共樣个、係平等个；每一個族群个語言，係該個族群个人盡重要个文化表徵，也係族群个人最好用來表達思想、感情个語言。用客話寫文學，寫出客語文學，彰顯語言个民主性、平等性，也正做得生動寫出客家族群个生活、文化，表現客家族群个思想感情、價值觀念。

1.民主个語言觀 
每一個語言个產生在俗成約定：一群人，在一個地方，經過一段時間，為著溝通想法、思想、感情、觀念等等个需要，發展出自家个一群人使用个語言。無任何一個人做得規定愛仰般發音、麼个意思、仰般講法，愛大家遵守！全全係一群人俗成个共識，共同知得、共同了解、共同用這種語言來講：zoi24係麼過个意思；zoi24 zii31係麼个意思；ngin11 zoi24 kon55 mien55 qiu55 di24又係麼个意思？知得語音同語義係約定俗成，知得意思，還知得這毋係威權主意、個人限定！因為語言个約定俗成，這群人（逐儕）為著溝通思想、感情个需要，就愛遵守這規則來行，尊重恁樣个語言共識，故所，語言个產生，有民主个意義！

2.平等个語言觀
所有个語言就係地方話，就係一群人長期對一個地方發展出來个，全世界个逐個語言就係恁仰來个；逐個語言，就有厥語音，語彙（構詞）、句法還過語用，不管英語、日語、韓語、越南語、西班牙語、台語、客語、北京語…，全世界个語言，就共樣有恁仰个語言共同性！無哪個語言較高級、較低俗。故所，對待各種語言，對待各種語言使用个人，應該互相平等看待，尊重理解，正毋會像這下有國家/地方語言，強勢/弱勢語言，官方/非官方語言……，無平等个語言現象摎分類。

3. 族群、語言、文學觀
語言，係人類重要个思維工具。語言个產生：一群人、在一個地方、經過一段時間，有表達、溝通想法、看法、感情等需要，漸漸仔發展出語言。廣義个語言：口語（口頭用語）、文字（書面用語）、手語（肢體用語）。語言係族群表達感情、思想最重要个方式，這位講个族群，係有共同語言、文化特徵个一群人。

語言，係文學創作个工具，創作文學形式同內容。像口語傳下來个民間文學，有口傳/變異、集體/匿名个特質，童謠、山歌、老古人言（俚語、俗語、諺語）、民間說唱、戲文等這兜都包含在內。書面文學，作家運用文字寫作个文學，有文傳/固定、個別/具名个特性，創作童謠、兒歌、詩、散文、小說、戲劇包括在內。

語言，表現詩歌、文學个內容，同時也係構成詩歌、文學个形式；詩歌、文學係語言个藝術，文學藝術包括作家个感情同思想，還有作家形式美學个追求。
語言同時也係族群認識世界、解釋世界，對世界做出反應个重要手路！客家人為自家生活个地方、自家組織个社會，包括人、文、地、景、產業等等安名，表現自家面對自然、人文世界，同別个族群無共樣个看法、觀點。人類个思維愛用語言；文學个創作愛用語言；族群感情思想个表達愛用語言；族群認識、解釋世界、對世界做出反應愛用語言。語言，企在當重要个位跡！ 語言係文化个內涵之一，同時也係文化个載體同顯明个表徵。

也就係講，客家語言係客家文化个內涵之一，同時也係客家文化个載體同表徵。客家文化來自客家人个生活，客家人个生活，不管係感情、思想、價值觀念个反應同表現，全全愛用客家語言來體現、解釋，正會精確、親切、生動，無成，用別个語言就無法度直接表達，單淨會變做一種翻譯，當難準確、真切、生動表現客家人个生活、感情、思想、觀念同價值觀。就客家族群來講，客家語言，毋單止係溝通个工具，同時還體現客家个文化，更深入來講，客家人用客家話詮釋、創新客家族群生活个自然同人文環境！

做一個客籍作家，會講客家話，就有創作客語文學个才調。用客語來寫作文學，毋單止提昇客語到書面用語、文學語言个層面，同時豐富客家人个文學世界，這對提昇客家人使用客家話个自信，豐富同創新客家語言，係當重要个！

講著客家語言係客家族群个命脈，客家語言係客家族群文化最重要个表徵，乜係客家族群文化最重要个記載方式，當然乜係族群最親切溝通感情、思想个工具，用客家話寫出客家人个真情、用客家話寫出客家人个思維、觀念同價值觀，係當自然个方式！用客家話書寫，毋單止溝通了客家族群个感情、思想，同時乜表現了客家族群个文化！ 假使用客家話最做得表達客家人个感情、思想；假使用客家話最做得體現客家人个文化、命運、價值觀；假使用客家話最做得詮釋、創新客家人个生活，該用客家話來寫詩歌、文學係客家詩人作家，最值得行个一條路。

雖然目前，這條路行來當孤栖，雖然這條路行來異孔翹，毋過在路項，你會看著當靚个風景，心肝肚會試著當有意思，當有價值，假使緊來緊多客籍作家行出來，在客家語言文學个道路項，連心牽手，這條路會緊行緊闊，緊行緊好行，這係客籍作家該當愛有个思維、當做得有个堅持。

4.慣勢講客話，勇敢寫客文
在電臺，用客家母語講話；在屋下，用客家母語講話；在媒體，用客家母語講話；在公眾，用客家母語講話；在教育，用客家母語講話；在學術，用客家母語講話；在文學藝術，用客家母語講話；在工作上，講出自家个客話母語、發展各行各業个客語行話；保障客家族群母語使用權、傳播權、教育權个行使，係國家語言主體多元个表示。認同客家个客家族群應該講客語、寫客文。