張芳慈客語詩

●嫁妝

蓬線衫方有一蕊
阿姆繡介大紅花
細細領介蓬線衫
一針一線係阿姆介手
織出介燒暖圍緊
分我異像毋識堵著寒天樣

蓬線衫方有一粒
阿姆織介星
細細領介蓬線衫
發光介星照緊頭前介路途
較暗也毋使驚

早都著毋落
摺舒適放入櫃肚
等妹出世
著起歸拖箱介回憶
過一擺感覺阿姆介愛

●門簾

門簾面頂繡緊
阿奶時代介色樣
蕊蕊介紅牡丹
分東南風吹來吹去

門簾面頂繡緊
細薪臼心肝肚介夢
搞水鴛鴦介圖樣
續分西北雨濯濕

毋用過時介款式
細妹人介間方
掛緊白色蕾絲介門簾　
假像係玫瑰花色
一縫一縫濛沙樣介愛情

門簾前門簾背
出入介身影
細賴人敢看得穿
細妹人心肝肚介花色麼

------------
謝宇威 - 花樹下