客語詩展

●驛站 / 江秀鳳《江嵐》

這場雨落來還大
河灞唇个公廨茅寮滴滴溚溚
澤蘭像流水樣仔个記憶
三朝元老咩無法度排解个宿題
愛用麼該度量這時雨時青个天時
河灞水噥噥噥噥唸毋會悚
在西拉雅个土地上
看著先民大嫲粒牯个汗
係心酸　也係驚心
聶爧在子時个天頂
像一隻惡擎擎豺狼裂齒个怪獸
雷公拚拚滾鬧無停　
彈跳在天邊海唇
阿立祖化做水體降臨
向婆用豬羊米酒血祭天地
西拉雅个子民魂遊四海
歌聲緊來緊遠緊細聲
身上流等平埔族个血統
尋毋著祖靈个位所
假始這係一個驛站
捱甘願在這等你
等你帶捱轉去該位
有阿姆話个所在

●江秀鳳 筆名江嵐，苗栗銅鑼灣人。
寫作品類豐富，同時以華台客語寫作;
以客語詩參賽獲本屆南瀛文學獎詩首獎。