曾貴海作品

看海

曾貴海作品



三歲左右

大人牽我去看海

沙岸上的熱氣

像白色蛇哥搖來搖去

第一擺看到海

驚走一下

那有恁大的東西

看得到的全部就係海

透到遠遠的天邊

幾萬條白浪湧過來



中學時代，寒暑假一到

半夜常常聽到海湧聲

想到了，就騎自轉車去看海

海像知己朋友對我講沒停

有時節，脫掉衫褲

泅入海肚

分海浪沖流



臨暗時節

落日照射大海

雲彩搖動灣波

一條橘紅的光輝大路

對海岸筆直攤到天頂項



暗到看毋到人的時節

海也濛濛霧霧

漁火佇海面攝呀攝

我就惦惦離開



戀愛的年紀

轉熟仔生滿面

暗晡頭偷偷帶細妹仔去海邊

星仔對天頂浮出來

雪白的月公像大拜箕掛佇海角

月光光開滿海面同木麻黃

歸暗晡，海吻著海邊

我攬著佢腰身

金色漁火搖亂我倆儕的心



中年後

久久歸去故鄉坐佇海邊

海沒再對我講麼介

自自然然大聲小聲唱起來

像和尚的木魚聲

單純的生命歌聲

海唱我也唱