客語作品

張淑玲客語作品
＜一張相片个故事＞
上隻禮拜日放尞，亻厓摎阿姆掭手整理櫃仔，看到一張黃黃舊舊个老相片，相片裡背係一群小學生仔。亻厓問阿姆：這兜係麼人，阿姆拿等相片看咧異久，笑瞇瞇个摎亻厓講。這係亻厓小學時个相片，該下亻厓係班長，這張相片係亻厓這班參加合唱比賽歙个相片，企佇頭前指揮个係阿姆啦！亻厓兜還打第一喔！！阿姆實在還慶。

從細，阿爸佇大學教書盡煞猛，打早出門，斷烏正轉屋。阿姆就無上班，逐日無閒煮三餐，照顧一家大大細細，亻厓摎兩個阿姐盡有福氣。受到阿姆最好个照顧，「飯來伸手」，學才藝，參加活動，阿姆安排到盡好，成時仔亻厓試著阿姆像人係極樂仔，無自家个時間。

今晡日因為一張相片，阿姆摎佢從來毋識對亻厓兜講个事情講出來。原來阿姆以前係中興大學中文系畢業个學生仔，盡優秀，當早就考著公務人員，有盡好个頭路，尾來，因為結婚，降下亻厓兜。阿姆甘願犧牲自家，分阿爸專心教書，佢放忒好頭路，想分細人仔得到最好个照顧摎教養。今晡日亻厓兜讀書順序，當乖當認真，都係阿姆个犧牲換來个。

看等這張相片，亻厓想到客家老古人言：爺娘想子長江水，子想爺娘擔竿長。這句話係愛勸話人愛有孝阿爸阿姆，亻厓想亻厓一定會做到，爺娘對亻恩俚个恩惠大過天，仰做得毋曉想呢 ?

＜吾爸个故事＞
細細个時節，阿爸个家境盡艱苦，阿公摎阿婆都係耕田人，盡無簡單正畜大七個細人仔。
　　讀中學个時節，阿爸佇班上有一個盡好个同學，係一個屋下盡好額个人。佢个飯包仔逐日都有當豐沛个菜色：成時仔係當香个排骨飯；成時仔係當有味緒个牛肉飯；成時仔係好食个魚仔。啊！單淨想到就會分人想愛流口瀾水。毋過阿爸打開佢自家个飯兜仔，續常透仔只有番薯籤定定。

　　該央時，書係當珍貴个東西，學生用个參考書也共樣。阿爸逐擺都想，假使這學期做得囥到罅用个錢，來買參考書，那就係最讚个事情咧！但係這隻夢想，續從來毋識實現過。阿爸該個有錢个同學，有當多本參考書，國文、歷史、物理、化學…，他續連一擺都無讀過，淨係摎佢兜放佇托箱肚，放學再帶轉屋家。
睡當晝个時節，大家都覆佇桌頂項睡當晝，阿爸頭腦肚想个全部係頭先先生教个英文、數學、還有物理先生上課个內容…坐在脣頭个好額个同學續睡忒咧，故所阿爸就恬恬仔對佢个托箱肚拿出一本參考書，看著異入文。到睡當晝會結束該央時，再恬恬仔放轉托箱肚。一段時間後，煞猛讀書个阿爸包尾在班項拿到前三名。

　　這係阿爸常透仔摎亻厓講起个故事。原來在頭擺，好食个飯兜仔摎參考書，都係一般細人仔毋敢想个東西！再想看自家，阿姆逐日摎亻厓做飯兜仔，還會準備果子；逐學期我也都做得買到罅用个參考書。真經係當有福氣！亻厓會好好珍惜有恁好个生活，因為惜福个人正做得體會到最幸福个滋味。

＜亻厓做過个一件好事＞
佇亻恩俚个生活肚，逐日總係會發生、大大細細、無共樣个事情，有兜、
亻恩俚一眨目、就毋記得咧，有兜事情續分人、印象當深。
有一日，阿姆佇六點該時、來到安親班接亻厓，亻厓兩儕佇臨暗、靚靚个日頭下慢慢行，來到士林捷運車頭，準備轉屋。就佇這下，阿姆忽然間想到、有兜東西毋記得拿，愛轉辦公室一下，阿姆就分亻厓十个銀，喊亻厓在等佢个時節，去店仔買只包仔來食。
亻厓正愛行落店仔時，該個熟烙个聲音又在亻厓个耳空（公）脣緊喊：「細阿姐仔！愛買樹奶糖仔無？一條正十个銀。」我斡頭看啊到、原來係該個、逐日佇車頭賣樹奶糖仔个阿姨。雖然這下係上下班時間，來來去去个人恁多，但係，上上下下个人，就係無人肯停下腳步摎佢買。亻厓看到逐擺有人經過，阿姨就會疲爬極蹶个偎過去，笑瞇瞇仔，煞猛个問：「愛樹奶糖無？」但係，佢一偎過去，大家不係頭那斡走，無就遽遽行走，就係無人肯摎佢買。漸漸仔阿姨个聲音越來越細，動作也越來越慢，面項个笑容漸漸無咧，表情看起來當失望。
看著這個情形，亻厓摸一下衫袋仔，當想摎佢買樹奶糖仔，但係肚屎「咕嚕！咕嚕！」緊喊，實在係枵到「肚屎變背囊」咧。但係亻厓想到客家諺語講、做人愛：「知福惜福」。
亻厓有好个生活，轉屋阿爸阿姆就會準備豐沛个飯菜，亻厓愛幫助人，最尾，
亻厓行過去講：「阿姨，亻厓愛買一條樹奶糖！」阿姨看起來盡歡喜，緊頷頭緊講：「承蒙承蒙」，亻厓試著有講毋出个歡喜，正經係：『天轉笠女麻花』。奇怪，肚屎續毋會恁枵咧。
這擺个經驗分亻厓深深體會到，原來，成時仔、細細个善心，會得到恁多个快樂，但係對需要幫助个人、係恁大个燒暖摎希望。亻厓還愛感謝該個阿姨，分我學到這人生寶貴个一課，亻厓會永久記得這擺盡好个經驗，也愛盡亻厓个能力去幫助人，亻厓還愛祝福阿姨「肯打拼就會出頭天」。



----------------------
《文學客家》第2期邀稿
----------------------
●請用客家話來寫
一、客語詩歌、散文、小說、戲劇。
二、有關客語文學?隨想、雜感、札記。
三、有關台灣客語文學?論述。
四、客語書評、短評、自由論壇。
五、客語文壇活動、文獻史料。
六、截稿日期：2010年 5月底。

主 編：邱一帆
353 苗栗縣南庄鄉東村文化路3號
E-MAIL：tu6986@webmail.mlc.edu.tw
郵政劃撥：帳號16686525 黃子堯帳戶
新莊市民安西路245巷10弄9號
hakka_taiwa@yahoo.com.tw
（平裝）每期定價：新台幣140元.