《寫詩 》 Catherine Yen

本散文以"台語文"書寫, 登於「台文戰線第27期」(2012.7)

《寫詩 》 Catherine Yen


有一寡詩人因為關心世界，所以寫詩，另外一寡純粹因為創造所以寫詩，形式往往即是伊的內容；袂當否認的，一首詩變做一種毋免外求的存在，是一種足大的趣味，嘛是一項非常優美單純的代誌，但是詩偌干單安呢，彼是毋值le ka咱的生命匟入去的，這對讀詩的人來講嘛是相仝的道理。如果詩只是形式的滿足，咱會當簡單ka伊當作是一盤棋子抑是一碟好喫物，或者，伊所呈現的根本和生命本質的利害沒什物關係，所以不管寫了偌好，伊干單會當炫人目睭，但是無法度產生愈ka大的注意，真正有深度的見識從來攏是爭取來的，伊袂突然間發生佇空虛的思想內，因為”求取生存”和”慢慢ah知覺接近死亡”是兩項代誌。

詩的內容是為著分享人類靈魂的視角來表達的，彼種無內在的生命逼家己講真話，或者，干單佇平和有禮數的氣氛下所寫出來的詩，這款平凡作品的生湠會消滅其他的物件，伊毋單背離詩的嚴肅性，嘛往往去呵咾著軟弱抑是袂續癢的作品。假使伊是重要的作品，伊一定會撓擾著別人的安寧，上好的詩人永遠毋是 “好好先生”，嘛永遠毋是溫馴的貓佮狗，in會常常威嚇著咱既定的生活方式佮自我良好的感覺，伊會娶領咱擴展到未來，而且毋是予咱滿足現狀爾爾；重要的詩會改變咱固定思想的順序，但是溫和軟弱的詩，干單是一片拋荒地。

有寡詩人ka非常粗淺的觀念當作足深的學問來處理，這種詩人干單會當塑造一蕊一蕊機械式的花，親像現代美國詩人奈莫洛夫(Howard Nemerov)所講的：「反映佇語言內面的文明是各種形式的關係生湠出來的花園，花園外是未開發的深淵」，假使咱的內心干單對第一步的探求感覺滿意，彼個深淵即會變做足貧瘠，而且予人感覺非常厭煩。常常這類的詩人會表現出一種無幼路的氣質和感性，除了明顯看e著的、公認的抑是一般人常常咧講的代誌以外，伊對內部深沈的意涵攏無法度深入瞭解，嘛欠缺對現實的熱情，顛倒伊所興趣的是囝仔時代的種種細節佮家己單純感覺爽快的代誌，伊嘛可能痴迷一寡無深刻或者是無重要的事件，這種結果干單會當寫出新奇但是無重要的詩。詩是一種宏大的見證，伊綿爛唱著一種超越常理的偉大，伊讚嘆愛情和死亡，善佮惡，情慾和榮譽，以及其他無仝款的面相，伊所處裡的即是人生，抑即是詩人的人生，詩人嘛因為安呢得到生命的圓滿，雖然伊的人生無影比詩本身閣ka美麗。

這陣ah，我讀了阿傑儂‧查理士‧史雲朋(Algernon Charles Swinburne 1837-1909)的英文詩集，這本詩集是由東京帝國大學的英文助理教授Takeshi Saito（齋藤 勇）做介紹佮註解的，佇1926年（大正十五年）由研究社佇東京出版，這本書的裝潢非常雅氣，已經褪色的黑do紅的封面滾一巡金邊，du好真合史雲朋古典詩閣押韻的氣質；史雲朋是英國詩人、劇作家、小說家佮評論家，佇1903到1907年之間的每一冬和1909年攏被提名諾貝爾文學獎；伊的一生攏咧寫熱情，使用的語詞和字攏足華麗、優美佮續喙，句式巧妙，對文字尊敬的人絕對袂當無佩服伊所使用的形形色色的形容詞，讀伊的詩偌像咧慢慢lim著續喙的燒的可可亞牛奶，卻是我無法度發覺伊有什麼”熱情”，我毋知伊甘有必要了解這點, 嘛無確定史雲朋知影了後，伊的詩甘會寫了愈卡好，假使一個人的感情有一個目標，譬如一個女姓，一樁理想或者是一段不平的情緒，伊的書寫應該會變做愈卡精彩，但是往往佇感情產生了後，佇伊失去抑是贏著目標一段時間以後，伊的熱情即漸漸消失，毋閣存在。但是嘛有一寡人無寫熱情, 卻是傳達著熱情，譬如艾默生（Ralph Waldo Emerson 1803-1882）,伊是美國的大演說家，對廢除黑奴的直接、率真佮毋veh妥協的精神，常常予伊被人恥笑和反對，伊毋驚辛苦，一遍續一遍發表激進的廢除黑奴的演講，伊嘛無考慮身邊的人甘有洽意，干單按照家己心靈的指示佮公正打拼向前行。伊無加入任何公開的政治運動和團體，而且嚴格要求個人的獨立性，是一個「個人主義」者，伊閣堅持不需要擁護者，伊的信念即是「無限的個人」。假使有人對艾默生講伊是一個足熱情的人，伊大概會驚一趒，但伊實在是真正有熱情的人，而且嘛ka熱情寫出來，但是伊無法度談論熱情，因為伊從來毋知影he是什麼物件；有的作家干單會當講是好的工匠，in正直老實，但是無熱情，甚至有一寡詩人干單有激情，in寫性、寫死亡，每一項事件攏被這兩個元素變ka傷複雜或者傷簡化，結果即是用虛偽的外表去掩嵌內在的溫柔佮綿精，或者是用野蠻殘酷去掩飾受苦的見笑佮歹勢。作家希望家己的作品變做文學史的一部份，除非每一日攏繼續創作，和家己開創的歷史做伙成長，一直到家己變成歷史的一部分，哪無安呢，伊干單會使佇城市的某一個所在，佇一大堆的索引中揣家己的名字爾爾。