台灣客語書寫特刊

●阿姆介面帕粄 / 陳寧貴

佇台北大家講客家粄條
南部鄉下介阿姆講面帕粄
一條一條雪白介粄條
盡像一條一條
愐起頭擺介索仔
纏等我流浪他鄉介胃腸
乜纏等我半生人
緊行緊兼介思念

阿姆煮介面帕粄
先用大火熱油爆香蔥蒜
加半鑊水煮滾放入配料粄條
二十分鐘後開鑊
我鼻到四散穿逡
像發夢樣介香氣
分我流浪介胃腸
一下間尋到歇息介好所在

我愛離鄉轉台北該日
阿姆特別交代
愛煮出好食介面帕粄
定著愛用真材實料
正能嚼出故鄉介味緒

-----------------------------
張芳慈 / 甜粄味

撮做籤
攤在禾埕方曬燥
 食到八月半
逐擺過年
 婦娘儕將自家
 當作磨石
迷迷迴到三光半夜

甜粄介味緒
 細細口緊食
 阿姆介艱苦啊
 映入做妹儕心肝肚
 續無半屑甜味

-----------------------

●韻╱ 江嵐

恁多年仔，自從毋識笑過

該般單純个青春，恬恬仔卸忒粧

十六歲就嫁分這片山林

重重踏過水田个阿姆个記憶悠遠

來到坎坷貧瘠个山城

種茶、燒火炭、焗香茅油

雞啼狗吠个宿命

一群分人打毋記得个赤牛仔



在體內个血脈底肚尋祖先个影跡

如今，佢兜个面目佬臊味係這般生份

常年纏綿病塌，阿爸个呻聲

鄉人，揮去熾熱个日頭

　　　續降下满地个流星

玉清宮个香火共樣年年鼎盛



恁多年仔，自從毋識笑過

無身世也無籍貫

一生人，毋識看過海生來仰般

　　　　　　　　　　　　　　　　　　　　　　返回目錄



●Koma／ 利玉芳



恆春大地動

好比一粒原子炸彈

擲落廣島



分析家

毋知傷著別人儕



一粒Koma

用力打在地泥項

震動个規模擴大

忽然間

跌落荒廢个防空壕



註：Koma（地方客語）：陀螺

　　　　　　　　　　　　　　　　　　　　　　　　　返回目錄



●問 (分吾叔伯老弟) ／ 林明昌



阿叔

一大早起床

第一件事情

田項先巡一輪轉來

臨暗頭

共樣田項巡一輪轉來

吾緊想

仰使日日恁樣



阿叔過身後

吾一大早起床

第一件事情

田項先巡一輪轉來

臨暗頭

共樣田項巡一輪轉來



還細介賴仔頭昂昂望著吾

吾挲挲佢介頭那

無講半句話

　　　　　　　　　　　　　　　　　　　　　　　返回目錄



●隔壁介老阿公 ／楊傑美



日頭落山耶

我還看到

隔壁介老阿公

佇田唇巡田水



老阿公心恁好

命恁歪

一儕人

佇臺灣



佢想起賴仔佇日本

佢想起妹仔佇米國

佢想起日本時代

日本警察打佢用擔竿

佢想起第二次世界大戰

米國轟炸機屙屎像屙卵

佢想起得癌症

舊年死剔耶部娘

目汁親像老屋耶屋簷水

滴滴跌



日頭芒出來

親像看到

隔壁個老阿公

一儕人

佇田唇項

巡田水

　　　　　　　　　　　　　　　　　　　　　　　返回目錄



●認字 ／劉慧真


掘泥，開園

委種（播種）

阿公用钁頭（鋤頭）教我

甕菜

金瓜

茄仔

tomato

大細長短圓扁

烏白青紅黃紫

適（從）地泥生出來介字--

春 夏 秋 冬

　　　　　　　　　　　　　　　　　　　　　　　返回目錄



●在遠來山頂看夜景 ／葉日松

　

日頭落山以後

感謝天地介一片蒼茫夜色

用最溫柔介手法畁花蓮介燈火

綻出千蕾萬蕾介花朵

天頂介星仔 所有介燈火

點頭相望 隔空辯論



太平洋左岸介船隻

無論大大細細 全部駛入花蓮港歇睏

海上介點點漁火 不時發出光亮介信號

傳達畀遠來 睡介人客 出頂夜遊介一群人

希望暗晡夜平靜介心情

愛跈恬恬介海浪

由左岸拉到右岸 再過從東片拉轉西片來

像風像夢 漫遊在星空下 海原上



暗晡夜 看到頭擺、這下、 未來

因為晡夜介月光 係頭擺介月光

係這下介月光 也係未來介月光

山共樣、海共樣、星仔共樣

風 雲也共樣

唯一無共樣介係頭擺介人毋知有遠來

未來介人也無一定有機會來這

企在 企過介所在看夜景



暗晡夜 在海岸山脈介最北端

企在遠來介看東華、港口、美崙山

還有無閒介計程車 城市

到底麼儕先歇困、睡目

麼儕會跈 來寫兩首現代詩

一首寄 遠方介古人

一首留 後來者去朗誦

　　　　　　　　　　　　　　　　　　　　　　　返回目錄



●麼介事都毋愛做 ／思容


麼介事都毋愛做

恬恬鼻等海風个味緒

靜靜看等一蕊一蕊个雲

變到當多个船仔



麼介事都毋愛做

就等等日頭花慢慢个歸



麼介事都毋愛做

臨暗个時節

イ厓看等汝

汝看等イ厓

世界就幸福囉

像二尾魚仔

在海肚唱等歌