南台灣六堆保衛戰

-----------------------------------
1721年南台灣六堆保衛戰
1895年 南台灣六堆保衛戰
----------------------------
1721年南台灣六堆保衛戰
面對-----天光日  / 陳寧貴
1.

清康熙六十年（西元1721年）
得人驚个消息
比箭仔還較遽較利
直直射入客家庄人个心肝頭

聽講朱一貴个部隊
蓋像一大片烏雲
烏天暗地
緊飄向下淡水溪

這愛仰般正好？
逐儕在問：
客家族群對唐山
拼命渡過會食人个烏水溝到台灣
台南安平上陸後
根本就尋毋到著腳所在
千辛萬苦南下
來到屛東竹田濫濫庄開基
用血汗同泥漿作戰百過年
正用銅皮鐵骨建立起家園
現下朱一貴佢等就愛入侵
這愛仰般正好？
這---愛仰般正好？

2.

客家庄一下間
就慌慌跌落
分人掛吊个險惡大風大浪底肚
客家大老也惶惶趕遽相邀
在內埔媽祖廟集合開會

黏時決定
十三大庄六十四小庄
成立六隊﹝堆﹞鄉團
中堆﹝竹田鄉﹞、先鋒隊﹝萬巒﹞
後堆﹝內埔鄉﹞、前堆﹝麟洛、長治﹞
左堆﹝佳冬、新埤﹞、右堆﹝美濃、高樹﹞
特別選出盡得人望个大總理李直三帶頭

這時節
發出晴天霹靂號召
硬頸熱血客家好漢
蓋像大海湧
對四面八方湧來
組織成一萬三千零儕个雄獅大軍

共下用雷公聲宣誓：
我等个客家家園同客家命脈，
我等定著會再用銅皮鐵骨保護等！

3.

客家軍在下淡水溪个平原
用肉身築起鐵樣堤防
擋等像土石流沖來个敵軍
分六堆客家庄
每一吋土地
每一粒禾榖
都無半息著傷

後來个
1732年吳福生事件
1786年林爽文事件
1895年抗日事件
六堆子弟英勇出堆保護家園个故事
像恁烈个日頭
永遠照耀在世人心肝底肚

不時愐起
頭擺該恁紅个鮮血
流在客家家園
一點一滴
蓋像忠義个種籽
在六堆个大地發芽
既經開出盡靚个
台灣之花



● 陳寧貴
面對---臨暗
---1895六堆保衛戰
●

大風如弓，
暴雨像箭，
也不能射傷我等！
霹靂震天，
雷霆萬鈞，
也不能分我等變成
著驚縮翼介
大地飛鷹！

●1895六堆保衛戰

1895年11月11日
日本乃木中將介艦隊
像震天撼地雪亮之劍
刺入南台灣
日軍耀武揚威
對枋寮登陸後逼近下六根﹝今佳冬﹞
佢等貼出告示----
擎白旗迎皇軍者相安無事
反抗者誅殺至雞犬不留

這時節對台灣北片向南片
一路掃蕩而來介日軍
既經逼到高雄屏東一帶
佢等南北夾擊
準備一下手板就收服台灣全島

●西勢---忠義亭

南台灣六堆人民介緊急會議
在熱血中緊滾
主戰同主和介暗中拔扯
感性同理性介激烈交擊
火花四濺！

直透雲霄介聲音
驚天動地響起--
頭可斷！
血可流！
寸土不可失！

對陰暗中遲遲疑疑
驚驚縮縮介聲音也響起--
台灣大官人
既經全部遠走高飛
吾等勢單力薄
蓋像係用卵擊石

話一歇
群情像颳起一陣驚人介超級颱風
要將這閃閃爍爍
礙眼介燭光黏時
吹滅！

眾人尋出發言者
將佢捆綁在桌腳
大聲緊罵--
懦夫！
懦夫！
懦夫！
懦夫！
懦夫！
懦夫！

主和派到尾驚走
無過，這時節族群生死大戰像悶雷
正愛對天邊烏雲中
驚心滾動出來

●下六根---步月樓

日本將軍桑波田介目珠
既經跋上頭那頂項
緊愐緊偷謔
這下六根庄民
就愛歡天喜地來迎接
我這粒金鬧鬧介新日頭出現囉

轟！驚天大聲
發夢也無想到
一門古砲對前面衝出
像盡久無發威介雄獅
撲向愛來採收勝利甜果介日軍

佢介利爪向四片大力爪去
日軍一著驚
黏時變成天上飛介血肉
日軍因為人多勢眾整軍反擊
那門古砲一息也毋驚
共樣煞猛大麻聲緊咆緊哮
到尾實在毋堪高溫
自家爆炸壯烈成仁

這時節下六根義勇軍
既經將自家變成砲彈
向敵人圓身項緊擲﹝jet﹞
血肉蓋像大雨緊落
一下間大地種滿
保村護土介紅花
到裡尾因為寡不敵眾
只好像後方撤守----

●長興庄---火燒庄

譴到會死介桑波田
來到六堆最尾一塊防守地
也是抗日總指揮
大總理邱鳳揚故居---前堆長興庄

桑波田對屏東運來
烏麻麻蟻公樣仔介日軍同大炮
用三面鐵桶包圍方式
腥風血雨猛攻而來

長興庄跌入大火海
邱老總理在飛沙煙硝中
同烹煮人心介死亡戰鬥
佢滿面黑污一身都係塵土
作戰中一粒砲彈飛來
一雙手遽遽將佢推﹝sung﹞開
佢同死神擦身而過
毋過用手sung開佢介第三賴仔
續中彈倒地

看等到處噴濺介血
邱老總理既經赴毋及
阻擋湧到心肝介悲傷
只好將目汁
趨歸哀痛介心頭

這時節緊來緊多砲彈
發癲樣仔飛過來
義勇軍一個一個倒地
戰士到尾存無幾儕
毋過日軍還像破堤大水湧來
將全部長興庄淹忒

唉！長興庄！
我等深愛介恁靚土地上
唯有忠義在火肚著到剝剝作響
肉身經過砲彈千焠百煉
昇華成忠義介圓身
像一面鮮紅介旗仔
在台灣歷史恁冷介泥灰肚
熱熱烈烈
昇起

●

1895年，台灣客家
用竹篙逗菜刀
加上硬頸精神
這時節，我等就準備行過
台灣歷史介大風大浪

到裡尾，留下肉身
分台灣大地做肥料
留下英魂，親像山櫻花
飄滿客家鄉土