一個新時代的開始

一個新時代的開始
――台灣文學再正名系列座談之一

●台語文學創作的原理toh是「言文一致」
――嘴講父母話，手寫台灣文。
你平常時頭殼用台灣話leh思考，
轉去房間內寫你偉大的文學，
m-thang放捨母語；平常時台灣話剌剌叫，
結果轉房間內煞換作北京話寫作，
toh是「穿雨衣洗身軀」――


時間：2006年3月17日（五）下晡14:00-16:00
地點：成功大學修齊大樓26319教室（3F）

座談主持人：蔣為文（成大台文系助理教授、台灣羅馬字協會理事長）
對談者：
黃勁連（詩人、金安出版社總編輯）
方耀乾（詩人、台南女子技術學院應用外語系助理教授）
蔡金安（《台灣文學正名》策劃主編、台灣海翁台語文教育協會理事長）
記錄：施俊州（成大台文系博士生）


蔣為文（以下簡稱「蔣」）：咱各位媒體先生、小姐，濟濟關心台灣文學發展的朋友，逐個平安出頭天。今na日誠歡喜chiah濟人來參與「台灣文學koh再正名」座談會。為啥麼欲文學「正名」？其實，chit個問題ti台灣歷史上一直leh重演。最近教育部出一套青少年文學讀本，其中一本詩卷收錄10首母語詩，有客語、有台語，台語部分亦有以漢羅書寫，但是誠濟媒體攏ui負面來報導，講台語an-ne寫不tap不chhit、用台語寫的詩chhan像「火星文」，be輸咱台灣人攏是「火星人」。實在講，客語、原住民族語、台語攏是咱台灣人的母語，thai家己來看輕chia-e物件？到底啥麼是台灣文學？敢講ai像余光中in chia-e人所寫的才是台灣文學？像chia-e人當初時反對「台灣文學」的存在，chit-ma be見笑、tng當台灣文學漸漸浮出檯面，反倒轉講in的物件ma是台灣文學！實在講chia-e人若有氣魄khia出來講：lin mai ka阮列入台灣作家、台灣文學內底，我是中國作家、我寫的是中國文學作品。an-ne我會足欽佩in，mai一下仔欲做中國作家、一下仔欲做台灣作家。所以咱今a日座談會欲來探討台灣文學、啥麼才是台灣文學？一開始，咱請台灣海翁台語文教育協會理事長蔡金安老師來踏一個話頭、kap咱來分享伊為啥麼欲來出版chit本《台灣文學正名》。

蔡金安（以下簡稱「蔡」）：各位關心台灣文學、台語文的同志、學生、媒體、先進，逐個午安、逐個好！今a日咱來辦座談會、出版chit本冊，我個人扮演的角色，主要是欲搭一個仔溝通的平台，學者有學術的才華、學術理論，我是行動派的，所以由阮海翁台語文教育協會先來編chit本冊，將chit本冊盡量分予關心台灣文學抑是無關心的，甚至m知影thang關心的，包括政府官員、立法委員、教育、行政單位，甚至會反對台灣文學、所謂的中國派的一寡教授、學者，盡量發予in；目前台文系學生阮總發，若有氣力阮才chat力a chat力發予中文系學生。總是in無一定會完全認同咱的看法，對chia-e學者的主張、論述若有無仝意見，希望in會tang出來chhiang聲也好、「踢館」也好，目的是欲將溝通的平台、舞台搭出來，予人來討論；總是意見、立場ai明確，mai像拄仔主持人所講的余光中食雙港水，啥麼時陣講啥麼話、啥攏伊著，資源伊leh佔，名譽、光彩攏集中ti一個人身上，世間事哪有chiah奇怪的？台灣文學ai來正名一下，國家ai正名，文學更加ai正名。第一波是出chit本冊，就教中文系、台文系專家，總是ai有意見出來，be使逐項kek-tiam-tiam，be輸咱是狗吠火車；多元社會有多元聲音，無可能百分之百贊成，總是ai有反省出來，歡迎in khia出來發表意見；後手，in若攏kek-tiam-tiam、官我「好自為之」、m願表態，到時咱才koh來想辦法，看研究啥麼方案，看講「台灣文學正名」的議題會tang得出khah有意義的實踐場面boe。目前咱先ui有leh關心的成大開第一炮，另日比如講余光中的大本營中山大學，咱ma會使以「郊遊」的心情來lang一場仔（座談會），予逐家思考chit個問題。咱be使預設立場講in攏無關心，ma be使講咱的意見完全著，chit本冊出來逐家攏ai夯手、拍噗仔；做運動ai一步一跤印，希望透過論辯慢慢建立共識、慢慢改變社會的思想。簡單講到chia，歹勢佔逐家的時間。
蔣：若講著台灣文學史，在座濟濟來賓攏知影1920年代有新舊文學論戰，三○年代有鄉土文學、台灣話文論爭，回顧chia-e歷史，誠濟做台灣文學的學者攏誠肯定其中的台灣意識、主體立場，m過當tang咱leh創造當代（台語文學）新的歷史，顛倒表現出雙層標準。Soa-loai咱請另外一位台語界資深的作家、詩人――黃勁連先生，伊早期ma寫華語，但是人甘願放棄華文寫作、轉來寫台語，逐位作家若會tang an-ni，文學早toh建國矣！咱請資深的來講伊的經驗。

黃勁連（以下簡稱「黃」）：資深的，toh是濟歲人。時間leh過誠緊，一目nih二、三十冬過去矣；烏sim-sim的頭毛變白蒼蒼、變白毛仔，實在感慨萬千。咱今a日講的主題是台灣文學的正名，ti政治上需要正名，ti文學上敢需要正名？我感覺m免，因為台灣文學的名足sui，四正四正、無缺點，「台灣文學」chit個名sui kah……！chit-ma是名實的問題，名kah實無一致。一般人的理解，台灣文學toh是台灣人的文學，toh是台灣人用台灣人的語言思考、寫台灣人的思想感情、寫台灣人的身苦病疼、寫台灣人心靈的夢，toh是台灣文學；牽涉著的，上重要的是語言問題，但是有人tiau-kang逃避、閃避chit個問題。最近我有一個好朋友，咱mai指名，ti《台灣日報》「言論廣場」的專欄，toh是an-ne講：台灣文學m是kan-na語言問題。但是我認為，上重要的是語言問題，無語言toh無「文學」：明清時代，台灣人用古典漢文寫文學，日本時代絕大多數用日語思考、寫文學，戰後國民黨時代百分之九十九點五用北京話寫文學，這敢是真真正正的台灣文學？所以文學「正名」的問題走出來矣，時代、時代之間，一種語言反動另外一種語言，殖民語言作家往往反對新的語言主張，in是為少數人、是既得利益者，但是母語運動是為「多數人」――現在、未來濟濟以父母話思考、感受，咱濟濟在地的同胞――這是咱台灣文學正名運動名實核心的問題，是一種一勞永逸的運動策略。誠濟人舉愛爾蘭作反例，講愛爾蘭作家用英語寫文學，所以中國話文（華文）有伊合理性、合法性；其實這是錯誤的，愛爾蘭語欲死tong-haiN已經七百幾冬，但是咱的台語猶無死、猶活跳跳ku-ti廣大民間社會，千萬m-thang豬母牽對牛墟去，所以咱要求：真真正正的台灣文學，是台灣作家以台語所書寫的文學。

蔣：針對愛爾蘭的例，我簡單補充一下。人愛爾蘭ti精神上，上無ma肯定母語的地位，講英語是第二官方語言，愛爾蘭話猶是憲法上的第一官方語言，咱台灣連憲法chit類神主牌仔的意義ma撣撣掉，天差kah地。Koh來，我欲請教在座ma關心台灣文學的越南朋友阿雄仔：我寫誠濟有關越南、ti越南旅遊的日記、作品，你感覺he敢是越南文學？（阿雄回答：「m是。」）M是ne！雖然我hia的議題有關越南，並無代表hia我所寫的物件是越南文學；但是咱台灣文學界誠普遍認為，只要有關台灣人事物的作品toh是台灣文學。錯了！He是kan-na叫作 “主題有關台灣的文學作品”，無一定是 “台灣文學”。文類的認定必須有客觀條件，通常ui三方面來看：作者、讀者，以及文本的內容(被描寫者)三方面。比如講日本文學，作者是日本人、用日語寫予日本人看，而且文本的內容有關日本，an-ne三合一的情形當然是典型的日本文學。當然，有時有無法度三合一的情形會出現。像講，報導性的物件往往是作者、讀者二合一nia，親像我用台語所寫、有關越南的作品toh屬於chit類。Chit個例當中作者台灣人用台語書寫有關越南主題的作品乎台灣讀者看；像an-ni，beh算台灣文學亦是越南文學？Koh，若是作者kap被描寫者（文本內容）二合一nia，chit類通常是翻譯作品。譬如莎士比亞的台譯亦是華譯作品對台灣人來講屬於chit類，因為莎士比亞一開始是用英國人的語言寫英國的代誌乎英國人看。若ka莎士比亞的作品翻做台語，an-ne伊的作者kap被描寫者是英國人，m-koh讀者變做台灣人，所以講是二合一nia。若是作者kah其他二項無合，比如早期巴克禮、甘為霖等外國籍人士，以白話字書寫台灣事務予台灣人讀，認定上往往會產生爭議。總是，國家文學（文類）的認定ai加上語言一項，簡單講：台灣作家以台灣母語寫予台灣人看的作品toh是台灣文學；若是台灣作家的華文作品雖然屬於台灣文學的一部分，畢竟m是本國文學的正範；這牽涉著原底文學作品是欲參啥對話，以及代表性的問題。簡單補充到chia，下面咱請台南女子技術學院應用外語系助理教授、詩人兼台文研究者方耀乾先生發表意見。

方耀乾（以下簡稱「方」）：非常感謝各位。今na日座談的題目是「台灣文學再正名」，為啥麼ai koh再正名？這牽涉著一個文學史的命題：現在台灣文學的名實問題，其中有當代的觀點、思考，ma牽涉「台灣文學」內涵的歷史變遷。既然現在台灣文學的名實無符合，這名實無合的當代內涵、現狀是啥貨？台灣文學是啥麼文學、是啥人的文學？牽涉非常大，比如語言、國族，ma牽涉性命共同體的思考，當然針對國族、性命共同體的議題，無仝款的角度會產生仝款的思考kah策略。Ti「台灣文學正名」的思考箍仔內底，咱首先欲看的是台灣文學名實ti歷史上向台灣「現實」漸漸偎近、chhu近的現象，1920年代文言文kah白話文之爭、1930年台灣話文、鄉土文學的論爭，一般的理解攏是an-ne；到戰後，華語成作新的「國語」，七○年代發生「鄉土」文學論戰、八○年代台灣文學「正名」，議題攏有khah清楚淡薄仔，台灣文學名、實的距離漸漸有leh giu近。為何經過chiah濟pai論戰，如今咱欲koh來做「正名」？台灣主體的思考、文學書寫對象的優先性、書寫的本土位置雖然漸漸確立，但是到kah九○年代文學偏離的現象猶原存在，這m-na牽涉著台灣「人」的文學問題nia，ma牽涉「語言」，尤其到kah九○年代尾台灣文學正式進入體制、進入教育體系，台灣文學系所若親像中文系所的替身，ti課程的安排、師資人事的編制充滿中文系所、中國文學的「幽靈」；台文系所教授、研究生的頭殼、人格普遍有分裂的症頭存在，為啥麼台灣文學、文化經過幾落十冬的建構、經過chiaN百冬的殖民，統治者、殖民者的控制力頭漸漸leh thau放，殖民者、統治者已經離開、落台，一種文化的Stockholm symdrome，斯德哥爾摩症候群猶原流行？就是講殖民者離開了後，在地智識份子猶原慣用殖民者、統治者的思考模式，致使咱精神的「不在家」，toh是因為chit個精神無ti厝的現象，咱需要koh進一步來思考台灣文學的正名。拄仔蔣老師、黃老師攏有講著ti文學正名的思考之下，作者、讀者、語言、題材等等文學認定的標準kah內涵。此外有人講著作家的影響力、一種文學認定的「影響論」，比如講張愛玲影響台灣文學真大，所以伊是台灣作家。若an-ne台灣的戲劇受Shakespeare影響真大，所以Shakespeare是台灣作家；台灣小說受Tolstoy、Dostoyevsky以及其他露西亞作家影響真大，an-ne整個蘇俄文學應該屬於台灣文學。若按chit個視角來看，全世界上偉大、內涵上實腹、範圍上闊的文學體系m就是台灣文學chit個體系？這是一種奇怪的邏輯思考。Chit種假包容的意識形態、價值觀出現ti誠濟作者論的判斷上，成作台灣文學研究的錯亂意識。我話頭先踏到chia，有關台灣文學正名的內涵，等一下咱會討論啥麼是台灣文學、啥麼 m是台灣文學？語言kah文學辯證的關係、啥麼文學應然「代表」台灣文學？以及母語書寫，不管全漢、漢羅或者全羅書寫方式是m是火星文等等問題。多謝。

蔣：Soa-loai我ma是仝款做一個簡單的補充。目前有chiah大的爭論，語言ti文學內底佔著啥麼角色，我認為這牽涉認同問題；toh是講，你有認同華語是你的新母語、亦是認定華語的合法性無？有的人認為華語我已經講kah誠lian轉、華文我已經寫kah誠su-si，所以華語是我的母語、華語文有伊的合法性；但是有的人toh堅持無ai，雖然華語我講kah誠lian轉，不過參英語、越南話仝款是外語，攏m是我的母語、m是我的母語認同。誠濟人講語言只是溝通「工具」，其實語言不只是溝通的工具；語言有溝通的功能，但m是唯一的功能。外國語才是溝通工具；母語除了用來溝通，ma關係文化傳承、民族認同問題。譬如講，胡志明實際十外歲toh去歐洲、去法國，甚至ti外國的時間超過toa越南的時間，人猶是認同家己是越南人、越南話是伊的母語，總講一句，語言kah認同有正相關的牽連，文學kah語言、kah族群認同ma有誠相關的關係。目前台灣語文環境，講白toh是生米煮成飯的「現實」，有be少人toh慣習用華語矣，連同承認華語文的合法性。問題是咱欲承認華語的合法性無？若欲承認，an-ne在座濟濟會曉日語，甚至老一輩以日本話作母語的人，日本話講kah比台語、華語khah lian轉，咱欲承認無？英語、十萬越南新娘的母語越南語咱欲承認無？台灣文學的研究者be使有雙層標準，講華語算是台灣人的新母語soah ka日語、英語、越南語等排斥在外。咱無應該講有一部分台灣人使用華語就講華語是「台灣語言」、承認伊是台灣民族的母語。「台灣語言」(包含原住民語言、客語、台語) kap台灣「國民的語言」是二個無仝的概念。華語、日語、英語、越南語e-sai算是台灣國民teh使用的語言，m-koh無算是「台灣語言」。「台灣語言」ai考慮土著化、在地化，以及傳統歷史文化代表性的客觀標準。若無，台語、台灣話會變成包山包海、主體性空洞的概念，拄chiah講世界文學是台灣文學的一部分，chit-ma世界各國語言攏算是台灣語言，an-ne toh亂去矣！我簡單補充到chia，m知咱台仔頂的先進有意見無？

黃：我來補充一寡想法。我感覺這是咱台灣文學界的悲哀，李登輝前總統leh強調講台灣人有台灣人的悲哀，實際上台灣人的悲哀內底上大的是台灣文學界的悲哀。台灣文學煞變作「聯合國」的文學，lin講有悲哀無悲哀？我欲請教各位，台灣文學系簡稱「台文系」，台灣語文學系（D.T.L.L.）欲簡稱作啥？台灣文學系簡稱「台文系」，ah he正宗原汁的語文學系欲簡稱作啥？伊be使簡稱作台文系嗎?!台灣人用台灣語言所寫的文學――簡稱台文，煞無包括ti現有簡稱「台文系」的台灣文學系所內底，至少目前猶ku-ti台灣文學系所內面作細姨，你講有悲哀無悲哀？Chin全國所有的台灣文學系攏乞食趕廟公啦！有夠可憐！若有一工台灣語文學系誕生，是m是ai簡稱作「台語文系」，加一字「語」字，有悲哀無？所以台灣文學若無語言的制約，台灣文學煞變作聯合國文學，你講會笑死人be了？會hong笑死！文學史、文學概論、世界文學的理論無chit種講法啦！台灣文學天經地義toh是台灣人的文學、toh是台灣人以台灣語言創作的文學，he語言toh是土地實際上leh使用、有文化歷史代表性的語言，包括台語、客語、原住民族語在內。我的好朋友莊柏林律師ti《台灣日報》寫專欄講：lin he心胸甚隘、雞仔腸鳥仔肚，若親像無包括原住民文學、客家文學，chhun ho-lo人的文學，錯了！規欉剉了了！台灣文學實際上包括客家人文學、原住民的文學，但是無包括一部分華語文學。我ti《正名》chit本冊講，台灣人用日語、華語所寫的文學m是台灣文學，lin會使ka當作「氣話」；我ma知我chit種講法kah《台灣文學正名》的整體意識內涵無完全一致，我toh是看be過華語文學作為一種體制、「討了便宜還賣乖」反倒轉來阻擋母語文學的發聲、反對新台灣文學的建構一時所想出來的「策略」，反正我m是講道理ui嘴「通」到底的學者，lin會使原諒我的「雞仔腸鳥仔肚」。不過，我欲請教在座上有世界視野、走過世界各國的阿友先生：lin法國人、全世界敢會認定北京話是台灣話、用北京話寫的文學敢有台灣的代表性？（法國留學生阿友用台語回答：「無！」）……

蔣：無ma！北京話真明顯，無toh叫普通話，無toh稱作華語，絕對be叫做台灣話，你叫胡錦濤來回答ma仝款。所以有的人認為台灣話包括北京話，toh有誠大的問題；台灣話包括台語、客語、原住民族語，但絕對無包括華語。這是我進前講的，主觀上、客觀上你會認同、承認華語的合法性無？比如越南移民，個人若欲以越南話創作，會使，he ma是台灣文學的一部分，但客觀上無台灣文學的代表性。台灣人有食sa-si-mih、有食suh-si無？有，但無人講sa-si-mih、suh-si是台灣料理，he是代表性問題。誠濟人講用華語創作，ma會tang創造有台灣特性的文學！？過去政治上有「台灣代表中國」的大頭病，chit-ma猶有文化大中國大頭症，認為台灣華語文學會使代表中國文學，或者主導中國文學發展、攻佔十三億廣大市場，我講he是空思夢想！咱政府搰力推sak全球華語中心計畫，背後ma是類似的邏輯意識。你欲學英語，你敢會去菲利濱、印度？英語ti印度ma是官方語言之一啊！仝款道理，外國人欲學華語，in會來台灣抑是去中國？我講一個例，舊年有一位越南學生欲來成大，咱ma予伊奬學金，結果人選擇中國、欲去北京。但法國同學阿友仔toh欲來台灣，因為人目標明確：我toh是欲學台語、做台灣研究，自然會來台灣。所以政府向望台灣成作世界華語教學的中心、掌握華語主導權，是一種新的文化政治迷思，ai ka拍破。台灣的出路toh是ai用本土語言，用原住民族語、客語、台語作主體來推sak，才有特色。韓國為啥麼欲創造諺文、創作家己的文字？越南、日本ma仝款，像chia有創造主體性、維護家己語言文字的民族，後來政治上、文化上攏獨立矣，若hit寡無創造、維護家己的語言文字的壯族、苗族，後來上加變作中國的自治區；台灣欲成作中國的自治區？抑是成作世界台灣語言、文化的中心？逐家思考。

方：Thau拄仔咱對語言、文學主體性的基本概念有做一定的釐清。我想欲延續台灣文學為啥麼欲正名、名kah實的議題，自然會牽涉著啥麼是台灣文學、啥麼又koh m是台灣文學的判斷。台灣文學的定義除了文本的因素以外，koh牽涉二個因素：作者kah語言。在我的觀念，作者的部分，雖然ti目前khah流動的世界、流動的理論內底，已經有khah無仝的解說；不過到目前為止咱所看的，主要猶是以國家、民族、族群的觀念來leh看社群文學，咱台灣ma應該是an-ne。也就是作者一定ai是台灣人（m管伊是原住民、舊住民、抑是新住民）。語言的部份，《大英百科全書》15版有講著國家文學的定義，有人提出疑問kah挑戰，不過猶是大多數所採取的觀念，比如英國文學是指英國人以英語所寫作品總稱，法國文學、日本文學仝款ma是按chit種的視角來定義，中國文學ma是如此。中國文學所講的是啥？Chinese literature，指稱的是中國人以Chinese language所寫的作品，注意！Chit個Chinese language並無用複數，若欲翻譯，翻作華語也好、漢語也好，漢語當然包括漢文古典文學。Chia所舉例的國家，內底攏有幾落個族群kah幾落個語言，不過咱所讀著的文學史主要猶是以in國家代表性語言English、French、Japanese、Chinese所寫的為主。台灣文學的正名，牽涉著作者的國籍，ma牽涉語言，以Holo話來講，占台灣母語人口73﹪，原住民南島語佔差不多1.7左右，客語佔12.3，chhun的13﹪m是講全部以華語作母語，其實以華語作母語的無夠10%。但是現在台灣文學煞以華語文學做主體；按chit個角度來看，咱所面對的問題，是咱欲建立家己的國家文學，你母語boai用，用華語，若欲參中國文學作區別會愈來愈困難。尤其目前全球化的時代，ui跨國資本主義、網路高度發展的情形來看，面對文化資本流動、大食細的原理、文化疆域拍破的情形，咱更加應該思考台灣文學/文化特色kah主體性的問題，語言本身是一個誠好的思考點。Tng-tang中國kah台灣的文學/文化的疆界愈來愈模糊的時，按語言的區別來切入，欲建立台灣的文學/文化的主體性是一個真好的方式。也就是台灣發展以台語、客語、南島語書寫的文學上好kah中國文學區別出來，khah好呈現特色。黃老師拄仔提起holo沙文主義，其實ui共同體的角度來看，咱認定台灣語言包括台語、客語、原住民南島族語，若講華語是m是台灣語言，除了蔣老師所講的土著化、傳統代表性主客觀條件，ma牽涉台灣政治現狀的認定：目前台灣到底是殖民，抑是後殖民時期？個人傾向認定目前猶是「殖民」時期，至少我認定台灣的精神主權現狀猶是被殖民的狀態。若講被殖民的開始亦就是後殖民的開始，當然，我ma同意chit-ma ma是後殖民的時期。目前文化、資本、人口充滿混雜、流動、離散的現象，所以會出現一寡奇奇怪怪的現象kah講法；不管殖民抑後殖民，ma不管華語是m是台灣語言，現實上，華語文學自然屬於台灣文學的一部分，咱會使ka稱作台灣華語文學，只是個別作家的認定必須根據個案來判斷。我個人主張，台灣文學的正名，一方面必須掠穩國家主體原則，另一方面會使兼顧流動的認同觀，觀照共同體內部無仝族群的獨立身份、兼顧集體kah個人的思考。

蔣：誠濟人講，做台語的攏心胸kheh隘，難道做華語的心胸toh khah闊？講著台灣文學，指稱的攏是華語文學，為啥麼欲霸佔chit個名？另外邊緣化母語書寫，稱作「台語」文學、「客語」文學，等等啥麼「語」文學。到底啥khah壓霸？照講應該稱作台灣華語文學，an-ne khah公平。黃老師欲發表意見？來。

黃：台灣文學參「在台灣的文學」ai分乎清楚。日據時代的文學，he是真真正正的文學，咱be使否認he m是文學；創作行為發生ti台灣，咱be使否認，所以咱ka叫作「在台灣的文學」，抑是「日據時代文學在台灣」。戰後，一部分華語文學ma仝款道理，是「在台灣的文學」，m是台灣文學；親像余光中先生、白先勇先生，in寫的作品是真真正正的文學，但in無認同台灣，所以是「在台灣的文學」，m是台灣文學，清河仔in後生――ai分乎清清楚楚。最近我認真leh讀楊青矗、黃春明、王禎和的鄉土作品，in的小說攏寫了be-bai，但是猶無夠好，因為in寫的攏是半chiaN-peh仔、半chiaN-peh仔語文，親像黃春明〈青番公的故事〉、王禎和〈嫁妝一牛車〉攏蕃簽仔soah米、炒一屑仔台語，m是百分之百用台語思考寫出來的小說，無夠好，所以以後無可能提著Nobel賞。台灣人若繼續以華語寫文學，是死路一條。

蔣：講著書寫的意識，台灣人對家己的文化無自信，私底下台語、客語講kah足lian轉，書寫的時陣，抑是ti公開場合煞換作華語、m敢講台灣話，這攏kah長期殖民統治、長期殖民教育有關係。親像有一寡人讀kah博士、有的koh出國留學，反倒轉來鄙相台語文化；實際上in是母語的文盲。台語讀寫的意識hiah-ni低陋，值得咱來探討的。

蔡：我平常足愛看小說，阮家己有出版一本中國大陸的作品《白鹿原》，是我看過上好的長篇。你看人he小說，用he陜北所講的「土話」、陜北高原文化來表現，雖然是華語作品，猶是有地方特色，m-na在地人、中國人讀會出其中奧妙，連外國讀者ma有法度體會in在地語言文化的sui喟；台灣的鄉土文學ma仝款，既然chhap一寡台語會使寫出be-bai的作品，無理由講純台文be使創造偉大的文學。台灣文學作家為啥麼boai用台語寫？台語足sui啊，sui kah啥麼程度？比如選舉場合，政治人物用台語發表政見，台仔跤噗仔聲證明台語聲嗽的力量；此外風物的分類名稱加足豐富，一種「螃蟹」有幾落種講法，其實是咱台灣海洋特有環境所造成，toh親像陜北、中國本土會tang創造人語土合一的藝術力量仝款。所以台灣作家為啥麼boai ka台語的力量化作文字力量，顛倒愛以失根的華語來表現？難道台灣作家寫的華文會比中國作家寫的khah sui喟？我看，答案是否定的。二十幾冬前我ti學校leh教歷史、客串教國文，我toh bat講過：國文是「失根的蘭花」，尤其是無hit-lo文化的底蒂、生活基礎的台灣人，想欲以華語作工具來表現在地台灣，會更加困難。簡單以一個讀者的立場，提供一寡讀冊的感想予逐家參考。

蔣：台語界、台灣文學若加幾個仔像蔡老師、黃老師chit種，toh有救啊。有人講咱ai用「中文」寫，khah濟人才看khah有。「khah濟人看khah有」竟然成作咱的作家最主要的目標！日本人敢會講：啊！咱toh ai用「中文」寫，中國人才看有？抑是用英文寫，全世界的才看khah有？咱的主體性ti toh？你是欲寫予台灣人看，抑是予中國人看？咱的文學、咱的創作對象應該以家己的社群優先；你若欲予別人看，he是翻譯家的代誌。莎士比亞敢會講：oh！我欲用中文寫予十三億的人看？所以，「用中文寫看khah有」只是in逃避台文的藉口。你若有夠謙虛，講：「目前我toh猶無法度用台文寫，姑不二衷暫時寫華文。但是lin做運動，我ka lin支持！公開支持！」An-ne咱會誠尊敬。M是啦！有的人足可惡：「啊，lin用台語寫無人看有啦！Lin寫台語的心胸kheh隘啦！」Be輸in用華文寫，心胸攏足開闊。若an-ne，為著表示lin心胸開闊，lin na-boai用英文寫、予全世界攏看有？講白，攏是既得利益者。自細漢受「中文」教育，「中文」是in唯一的書寫工具，所以反倒轉來反對台語運動、鄙相台語作家無水準。過去中文系鄙相台灣文學，chit-ma換台灣文學系打壓台語文學。各位，我大學讀的m是文學，是機械系，自細漢立志做科學家，做愛因斯坦、做Newton。為啥麼欲轉向？因為我大學舞台語，尾仔感覺做機械，全台灣無差你一個；但是台語運動需要你，加一個加一份力量。以前從來m-bat想欲寫文章、無想欲做作家，為著台語我liau落寫。心內想：lin看be起台語，我寫予lin看。包括誠濟語言學家ma看be起台語，1995年台灣語言學會辦研討會，會場竟然規定be使講台語！我足be爽，想講：「Lin chia-e語言學家攏無良心！換我來做語言學家。」所以我後來出國讀語言博士。台灣人ai有志氣，政治欲獨立，先建立文化自信心、將母語khioh轉來。Soa-loai，咱請方耀乾老師補充。
方：台灣文學應該用啥麼語言來寫？頭前講台灣文學應該「正名」、用台語來書寫，是目前咱認為正確的共識。黃老師、蔡老師講，台灣作家應該用台語來寫khai會sui喟，為啥麼？因為母語是咱的第一語言，kah咱的性命、kah咱的生活上有牽連；用咱上熟手的語言來表現，文學比較khah會幼路、khah會tang表現咱的情感。華語ti咱台灣基本上是「改造過」、「人工性」的語言，屬北方大陸性語言，欲用來描寫屬海洋性的台灣，自然會拄著khe跤絆手的情形，比如拄仔蔡老師講著「螃蟹」，ti台語內底toh有chim-a、紅chim、chhi-a、沙sui-a、三跤仔等等幾落種講法，但是咱自細漢接受華文教育，kaN會曉講是「螃蟹」，不管你看著的是toh一種「蟹」。Chit-ma咱若是作家，欲來描寫成大的校園，你講：「一眼望過去有好多樹，有紅的樹，有綠的樹、紫的樹，有什麼樹……」若問是啥麼「樹」，「反正都是樹」。你想，chit種文學敢會sui喟、會tang描寫論說khah懸層次的物件？比較khah困難。華語hong「硬性」、「剛性」殖民ti chit個所在，咱講伊有缺點，是指伊khng m著所在，right language無khng-ti right place。每一種語言攏是平等的，無khah懸ma無khah低，攏會tang發展出高懸層的文學，這toh是咱主張台語文學的原因。世界上偉大的作家、Nobel奬得主百分之九十五以上，攏是以母語書寫的。當然咱知影一部分偉大的作家，像James Joyce，伊無法度用國族母語書寫，一來in的國族母語已經規千冬無發展、差不多死去矣，而且長期toa-ti英國，英語已經成作伊的第一語言。這是少數的例，你be使ka少數的例當作是通例，提伊作反例，否定母語文學的合理性kah必要性，你ai看比例kah代表性。Ti咱台灣，除非經過三、五代的內化，華語成作咱的母語、咱的第一語言，若無台灣作家欲寫出搭心、入骨的作品，比例會誠少，綁跤綁手的創作風格會繼續存在。所以咱才會得出以台灣作家、母語二項條件，來為台灣文學再正名。

蔣：最後請黃老師簡單踏一個話尾。Soa-loai，咱欲開放現場關心台文的朋友提問。

黃：德國大文豪哥德，bat講過一句話：啥麼是傑作？傑作toh是天才的筆下，所出現伊上熟悉的生活。我的解說誠簡單，toh是用你熟悉的語言寫你上熟悉的生活，an-ne toh有可能寫出傑作。當然猶koh有一項條件：天才，作家ai有才華，若無拼一世人ma無khah-choah。台語文學創作的原理toh是「言文一致」――嘴講父母話，手寫台灣文。你平常時頭殼用台灣話leh思考，轉去房間內寫你偉大的文學，m-thang放捨母語；平常時台灣話剌剌叫，結果轉房間內煞換作北京話寫作，「穿雨衣洗身軀」――我的好朋友胡民祥博士講，寫華語文學toh親像「穿雨衣洗身軀」，文學一再失落。華語作家實際創作的經驗，是一種「翻譯」，言文無一致，無可能寫出偉大的文學；所以我拄仔講黃春明、王禎和等等，濟濟華文作家無可能寫出文學傑作。