溪洲糖廠五分車之旅 ◎邱一帆

五分車頂六七十歲个解說員，
向一群十二三歲个小學生，
輕鬆紹介溪湖到埤頭路項，
靚靚个風光。

●甘蔗

頭擺種甘蔗个所在
今晡日整做停車場
停車場項四五十部个轎車
一輛比一輛較新
一輛比一輛時行
糖廠底肚
看毋著蔗農煞猛堆疊，還過
汗流脈絡个身影
單淨
辦公室肚
吹冷氣个工人
閒閒
享受1919年以來
甜甜个味緒
毋知
有麼个愛做

（二）蕃薯

蕃薯生佇五分車路唇
堅韌个生命
綻出一皮一皮幼嫩个藤葉
庄下來个小學生知得
蕃薯
總係毋知幾下百年來
蕃薯子个命運
還有
頭擺擎甘蔗分人壓榨个辛酸

單淨
陪著歷史个目汁
吞落
心肝肚

（三）長豆

長豆，五月節愛食
一盤，透長年
福壽長長
常透，阿姆會講
一串，一生人
政治莫插
常透，自家會想
政治就像一條河壩
百姓就係水竇肚个魚仔
河水清清
魚仔唱出快樂之歌
河水汶汶
魚仔唱出悽涼之歌