江嵐 / ９２１介舊症頭又擎起來痛

陳先生：捱下學期愛在真理大學開現代詩，希望有客家詩作做得介紹分學生仔，在汝介部落格看到盡多客家詩作寫來當好，係毋係做得寄兜分捱編入教材課本肚！在這先承蒙汝介相惜！恁仔細！

承蒙分享＜客語詩的再審思＞，這擺教＜客家歌謠＞學生仔介反應係：一路里來印象中客家山歌除忒男女情愛就無別樣，聽起來像出山介音樂，佢兜當無合意，上到流行音樂該下，當多人正頭一擺知客家有恁現代介東西，對吳盛智上到劉劭希，學生仔講：從劉劭希介音樂中看到客家同國際接線！不再刻板印象。

客家詩咩共樣，大家愛煞猛寫，在若介網站看到恁多恁好介作品，試到當安慰，故所捱想大量編入教材，分大學生知得客家文學！

承蒙汝介相助，恁仔細！

●

江嵐：汝好。欲落山、愛落山，兩種講法都有，我慣習用欲，

有「將要」意思，請指教。

汝介作品有當純客家味，我在笠詩刊拜讀過，若客家話可能講比我好。

我在高師大母語研討會時節，堵到彭瑞金，佢無看好客家作品，

無要緊，客家人才盡多，在影音或文學會證明分佢看，著麼？

其實，盡多客語系研究所生，到我網站下載客家資料，寫信分我講：

沒想到有恁多恁好，又傳統又現代，無輸華語詩介客家作品。

觀望無採工，努力有成績，客家朋友請互相多鼓勵。

〔我希望能夠策劃每年出版一本「台灣客家詩展」

來搧火客家詩人寫客家詩介熱情〕

以後多聯絡，多指教。承蒙汝，恁仔細！

●

-------------------------------------------------------------

９２１介舊症頭又擎起來痛　　/ 江嵐

９２１介舊症頭

又擎（kia_）起來痛

２００６１２２６２０２８

恆春發出６．７　

深度２２公里介地牛大翻身

一分鐘介時間分你思考生命介意義

佇台南稅屋介３樓

喀（kak）等一隻細老鼠

瀉（sia）到外背去

９２１介舊症頭

又擎起來痛

家破人亡樓倒屋漏介經驗

分心肝頭糾筋

第二道介地動

就像坐佇犖犖确确(lok lok kok kok)

介老火車底肚

窗仔門相打

屋角喊痛介聲

佬捱９２１介膽汁

翻（pon/）到一禾埕

註：細老鼠：係一本書名，張捷明先生?客語文作品＜細老鼠同番豆＞。

　　　　　　　2006/12/27在西拉雅柚仔樹下