江嵐客語作品

●白沙屯 　　

沙灘　竹排　防風林（na_）
浸青介海水　桃紅色介彩霞
千帆點點像星光
網魚介歌聲唱到天背

番豆　西瓜　紅磚老屋
恬靜介莊頭　鹹鹹介海風
萬民心中有香火
媽祖介歌聲唱到天頂

陪祢行路轉外家
為祢扛轎過水過峎
對苗栗到北港
二百年介堅持
四百里路介來回
係恩白沙屯子女
佬媽祖婆盡靚介緣份

●挨礱披波 　　　

還細介時節
阿哥總係帶等捱去捉草馬仔
阿哥講該係著青衫介無敵鐵金鋼
頭那戴等外星人介探照目鏡
兩隻手擎等大鈸（pat_）鎌
大大粒介目珠當得人驚
阿哥總係拿來嚇捱
成時就嚇到噭
正來定定仔拐

過年過節磨粄介時節
阿哥愛同阿姆襯(ten)手放米
阿姆就煞力牯送（sung\）磨石

捱跋(bak_ )上凳仔企高高
愛看米仰般變粄仔
阿姆就會講
人當當在該挨礱披波無閒淬杈
細人仔毋好在這梗梗杈杈
阿哥看到當毋盼得
就會輕聲細語講
妳盡乖
去捉老虎哥同挨礱披波來分阿哥好無

阿哥又挑挑愛整勢捱
　看捱知毋知
　草馬仔、挨礱披波、老虎哥
　係一隻賊牯三隻名


註釋：
草馬仔：苗栗四縣腔是＜螳螂＞的意思。
大鈸鎌：（pat_liam_）大鎌刀。
挨礱披波：（ai/lung_ pi/po/），比喻磨石磨的聲音和旋轉的動作。
　　　另一層意思是新竹海陸腔說挨礱披波（ai\lung pi\po\）是指螳螂，
螳螂兩腳站起來自衛時和人推石磨的動作很相似。

●三　叉 　　　　

三叉个水比酒卡甜
千樹紅花係你留分捱
盡靚个風景
假使毋係心中有夢
又做得忍得幾多痛
佬阿姆个年輪
刻落佛祖个笑容底背
分人帶到五湖四海
分人賣到宇宙天邊
就毋敢毋記得
自家係樟樹个本質
毋管捱在奈位
吾个鄉音本本無改變

●老 屋 　　

落雨天
對屋簷下行過
滴滴溚溚介雨水
點點跌落吾介心肝窟(fut)

發風時
伊伊歪歪介門窗
用佢介老骨頭
撐等一門家風

好天時正知得
老屋用佢溜皮溜骨介手腳
佬皺之郎當介老面皮
恬恬仔記錄
一屋肚介春秋