陳寧貴客語作品

●洗面記

該日朝晨
佢捧出一盆水準備洗面
一犁頭
沒愐到一下間
佢介面
跌落面盆肚囉

啊 !
佢大聲喊出來
佢看到佢介面
佇水肚搖搖晃晃
漸漸擴大 漸漸碎去

佢趕緊伸手去撈
撈起來係佢 從來無識介面
一陣寒意浸入佢 心肝底肚

這時節
佢又趕緊將面盆水潑向禾埕
佢詳細尋歸朝晨
到裡尾麼介都沒尋到
佢不安問自家:
我熟識介面去奈位耶？


●欲落山介日頭

一群霸道介公共汽車
無愐到一下間
全部衝入下晝五點半
尖在汽車底肚介人
差毋多欲出油咧

另一方面
佢等惦惦將歸家介心情
磨成箭
遽遽射歸老婆子女介等待中

這時節臨暗介日頭
偷偷從汽車介窗仔尖入去

汝看！汝看！
一粒粒介頭那
蓋像一粒粒
欲落山介日頭


※註

愐：想
下晝：下午
尖：擠
底肚：裡面


●大禾埕

大禾埕盡像人生介舞台
蓋多戲佇這位
一遍又一遍演出

農忙時節
晒穀晒豆晒到人面像紅面番鴨公
大人同細人講毋莫亂走
當當晝晝鬼上樹

平常時節
細人佇大禾埕搞聊
散落一地
歡歡喜喜介腳步聲

暗晡頭時節
大人端凳來大禾埕
講頭擺生趣事情
汝一言我一語盡像畫符誥
月光聽到笑迷迷

有時節大禾埕麼介也沒
一個九十歲老伯婆
坐在屋簷唇看大禾埕
緊看緊大
緊看緊空

●恁久沒看

恁久沒看
老屋家介桂花樹開花否
恁久沒看
庄尾伯公下三頭番檨樹打番檨否
恁久沒看
佇伺堂屋簷唇介燕仔還有做巢否
恁久沒看
大禾埕暗晡頭還有戲團去撮把戲否
恁久沒看
西北橋下介河水底背還有大鯉嘛否
恁久沒看
老北勢三山國王廟還有做鬧熱否
恁久沒看
佛母壇還有老嫩大細佇介打嘴咕否
恁久沒看
老伯婆行過千山萬水介腳還會痛風否
恁久沒看
恁久沒看

李喬談陳寧貴介詩