名家詩展 / 賴和 等

２．【相思】___賴和《台灣新民報》

　　　　　阮是兩人相意愛
　　　　　若無說出恁不知
　　　　　阮著當頭白日來出入
　　　　　恁偏愛講人歹話
　　　　　使阮驚心不敢來
　　　　　娘子疑我合伊歹
　　　　　冥日相思真利害

　　　　　頭上貼著鬢邊膏
　　　　　身軀消瘦可憐代
　　　　　伊正洗衫我返來
　　　　　心頭歡喜撲撲猜

　　　　　只為身邊人眾眾
　　　　　不敢講話真無采
　　　　　恨無鳥仔雙箇翼
　　　　　隨便飛入伊房內

　　　　　３ ．【相思歌】___賴和
　　　　　前日公園會著君
　　　　　怎會即溫存？　
　　　　　害阮心頭拿不定
　　　　　歸日亂紛紛　　

　　　　　飯也懶飧茶懶吞
　　　　　睏也未安穩
　　　　　怎會這樣想不伸
　　　　　敢是為思君

　　　　　批來批去討厭恨
　　　　　夢是無準信
　　　　　既然兩心相意愛
　　　　　那怕人議論？

　　　　　幾回訂約在公園
　　　　　時間攏無準
　　　　　相思樹下獨自坐
　　　　　等到日黃昏

　　　　　黃昏等到七星出
　　　　　終無看見君
　　　　　風冷路涼艱苦忍
　　　　　堅心來去睏


　　　　　４．【阿爹的飯包】___向陽

　　　　　每一日早起時，天猶未光
　　　　　阿爹就帶著飯包
　　　　　騎著舊鐵馬，離開厝
　　　　　出去溪埔替人搬沙石

　　　　　每一瞑阮攏塊想
　　　　　阿爹的飯包到底什物款
　　　　　早頓阮及阿兄食包仔配豆乳
　　　　　阿爹的飯包起碼也有一粒卵
　　　　　若無按怎替人搬沙石

　　　　　有一日早起時，天猶烏烏
　　　　　阮偷偷行入去灶腳內，掀開
　　　　　阿爹的飯包：無半粒卵
　　　　　三條菜脯，番薯籤參飯

　　　　　５． 【若是到恆春】___宋澤萊

　　　　　若是到恆春
　　　　　著愛落雨的時陣
　　　　　罩霧的山崙
　　　　　親像姑娘的溫純
　　　　　若是到恆春
　　　　　愛揀黃昏的時陣
　　　　　你到海墘的晚雲
　　　　　半天通紅像抹粉
　　　　　若是到恆春
　　　　　著愛好天的時陣
　　　　　出帆的海船
　　　　　有時駛遠有時近
　　　　　若是到恆春
　　　　　毋免揀時陣
　　　　　陳達的歌若唱起
　　　　　一時消阮的心悶

　　　　　６． 【阿嬤的手】___黃越綏
　　　　　阿嬤的手皺皮皮
　　　　　重重疊疊親像折無好的綿織被
　　　　　伊細漢兄弟多吃泔糜無通配
　　　　　嫁尪生子奉太公婆無閒來反悔
　　　　　尪死守寡厝邊頭尾
　　　　　也擱有長短話
　　　　　等到孫子來出世
　　　　　台豬公謝天兼謝地
　　　　　寄望大小吃老免連回
　　　　　那知影新社會
　　　　　囝兒媳婦袂合分傢伙
　　　　　留乎伊的只存古早的梳妝台一塊
　　　　　黯淡的燈火
　　　　　阿嬤現此時三頓飯菜有通配
　　　　　只是無人陪
　　　　　日子無知也擱有幾歲
　　　　　阿嬤的手皺皮皮
　　　　　重重疊疊親像無地寄的一張批

　　　　　７． 【新莊街】____陳明瑜

　　　　　街頭到街尾，短短一條街
　　　　　囝仔時陣走到大漢，不知要行幾回
　　　　　古早厝的巷子尾，阮來躲古雞
　　　　　師公佇咧廟口念經與弄樓是亂亂轉
　　　　　阿母叫阮去街尾甲憨春仔買發糕
　　　　　拖著拖鞋來到街尾，來福在殺雞
　　　　　隔壁的木杞仔跟人咧冤家
　　　　　阿涼伯仔在茶店內講古是針滑稽
　　　　　行呀行呀，行呀行，行到了街尾
　　　　　憨春仔講伊生意不做，講伊要去吹鼓吹
　　　　　行呀行呀，行呀行，行到了街尾
　　　　　憨春仔講伊生意不做，講伊要去吹鼓吹

　　　　　８． 【白鴒鷥】____陳明仁

　　　　　白鴒鷥 腳長長 想卜相借問
　　　　　你來來去去 會凍飛偌遠
　　　　　敢會飛過 阮故鄉的田園
　　　　　牛車路 溝長長 想卜相借問
　　　　　你嚶嚶歪歪 會凍飛偌遠
　　　　　敢會行過 阮故鄉的田園
　　　　　自阮離開了後 故鄉早就拋荒
　　　　　干礁申著一坵菅芒花
　　　　　自阮離開了後 故鄉早就拋荒
　　　　　干礁申著滿腹 心酸
　　　　　十五暝 月光光 照著阮窗仔門
　　　　　月娘啊 月娘 會凍照偌遠
　　　　　敢會照著 阮故鄉的田園

　　　　　９． 【小雨綿綿】___黃勁連

　　　　　小雨綿綿
　　　　　落在阮厝的窗邊
　　　　　落在阮厝的今墘
　　　　　日黃昏 落駕暗暝
　　　　　食飯後的暗暝
　　　　　阮佮阿娘洗碗箸
　　　　　廳裡的燈火閃晰
　　　　　小雨綿綿
　　　　　落在阮厝的厝邊
　　　　　厝邊的柴堆
　　　　　小雨落袂離
　　　　　落在阮厝後的籃仔花
　　　　　籃仔花軟弱的花枝
　　　　　細漢的阮
　　　　　毋知憂愁啥滋味
　　　　　阮有聽見
　　　　　聽見阿娘塊嘆氣
　　　　　講 雨水無情
　　　　　雨水沃咱的柴堆
　　　　　柴堆又閣澹去
　　　　　雨水滴 雨水滴
　　　　　阮阿爸的薰
　　　　　一枝閣一枝
　　　　　伊講 無代誌
　　　　　雨水滴 雨水滴
　　　　　柴堆雖然澹
　　　　　家己會澹去
　　　　　雨水沃咱的粟仔
　　　　　會掛懷 會飽淀
　　　　　咱的粟仔會較大穗
　　　　　阮阿娘聽著
　　　　　這款的言語
　　　　　猶原嘆氣
　　　　　阮無心情
　　　　　來洗碗箸
　　　　　阮恬恬想
　　　　　想阮阿爸佮阿娘
　　　　　這款的言語
　　　　　想阮阿娘
　　　　　不時佇灶邊自言自語
　　　　　伊的人生啊
　　　　　那親像一篇淒然的歌詩
　　　　　窗外的雨水滴
　　　　　滴著阮的今墘
　　　　　滴著阮的窗邊
　　　　　滴著阮的柴堆
　　　　　滴著厝後的籃仔花
　　　　　籃仔花軟弱的花枝

　　　　　10． 【我的老爸】___林沉默

　　　　　矮矮，
　　　　　肥肥，
　　　　　短短短。
　　　　　對序細，
　　　　　無性地。
　　　　　有心事，
　　　　　囥心底，
　　　　　五十歲，
　　　　　脫膊赤。
　　　　　看儂歹勢，
　　　　　行路頭犁。
　　　　　有賺淋三杯，
　　　　　無賺照常過。
　　　　　毋驚天，
　　　　　毋驚地。
　　　　　到月尾，
　　　　　毋敢接電話，
　　　　　上驚厝頭家。
　　　　　嘿！彼個儂是誰？
　　　　　嘿是阮娘的好頭家！
　　　　　嘿是阮的好老爸！
　　　　　---一隻無殼的大露螺。
　　　　　
　　　　　11． 【金針花】___林沉默~送給台灣的母親~

　　　　　　金針金針
　　　　　隋隋黃黃。
　　　　　日來芳田園，
　　　　　暗到甜菜湯，
　　　　　青春獻了，
　　　　　無儂問。
　　　　　金針金針
　　　　　隋隋黃黃。
　　　　　分一蕊，
　　　　　插值阮媽媽的
　　　　　白頭毛。

　　　　　12． 【舅仔真笑詼】___林沉默

　　　　　舅仔舅仔----
　　　　　真笑詼。
　　　　　羅漢腳，
　　　　　三十歲。
　　　　　穿皮鞋，
　　　　　戴高笠。
　　　　　遷豬哥，
　　　　　去揣妻。
　　　　　過阮兜，
　　　　　來淋茶。
　　　　　講著豬母---
　　　　　嘿！嘿！嘿！
　　　　　真厚話。
　　　　　講著小姐---
　　　　　這！這！這！
　　　　　真歹勢。

　　　　　13． 【過去現在未來】___路寒袖

　　　　　有一個所在叫做過去
　　　　　只有對夢中才會凍去
　　　　　佇遐咱攏是青春的男女
　　　　　汝嘛知己，伊也知己
　　　　　憂愁，風一吹就消失
　　　　　怨恨夭未出世
　　　　　日子過駕親像一首輕蠓蠓的詩
　　　　　目前的所在呼做現在
　　　　　想卜越頭伊落已經來
　　　　　袂記也何時咱就分東西
　　　　　汝嘛毋知，伊也毋知
　　　　　委屈全部吞落腹內
　　　　　快樂沉佇酒海
　　　　　生活奔波有一點點孤單佮悲哀

　　　　　14． 【山路】___路寒袖／詞___詹宏達／曲　李靜美／唱
　　　　　
　　　　　佰崎的山路，彎彎閣翹翹
　　　　　盤佇山坡，盤佇咱的心頭
　　　　　汝的情牽著我的愛
　　　　　我的愛牽著咱的將來
　　　　　咱勻勻啊行來山頂看大海
　　　　　寂靜的山路，雙邊相思栽
　　　　　栽佇心內，栽佇眼前世界
　　　　　山頂生活無啥感慨
　　　　　干礁聽著咱喘氣的愛
　　　　　咱勻勻啊行來山頂看大海
　　　　　山路啊山路
　　　　　越過來聽著風
　　　　　山路啊山路
　　　　　越過去看著雲
　　　　　野草含著露水
　　　　　像雲遐呢厚
　　　　　濕入夢中，濕入夢中
　　　　　夢浮上山的肩胛頭

　　　　　15． 【寫佇雲頂的名】
　　　　　 ___路寒袖／詞___陳明章／曲　鳳飛飛／唱

　　　　　汝的名，寫佇水中央，寫佇雲頂
　　　　　飄東飄西，無時無陣
　　　　　這是命嘛是運
　　　　　定定孤單
　　　　　目睭金金等天光
　　　　　我的聲，吹著風，凍著霜
　　　　　盤山過嶺，一村一莊
　　　　　心會酸嘛會軟
　　　　　夜夜等待
　　　　　腳手冷冷尸眠床
　　　　　汝的名，汝的聲，水雲一過無留痕
　　　　　我的名，我的聲，風霜絕情啥儂問
　　　　　啊，咱前世天注定
　　　　　一生空等，無情無恨