主流的魚永遠泅佇變動的大海

●張德本

亻因 批評
你的論文無合學術規格
學術的棺材當咧量身訂做

亻因 蹺攲
你袂曉用理論以主見詮釋作品
扭曲當咧壓制文本

亻因常在提起
後殖民
殖民卻佇愈幼路中進行

亻因 套用
解構
結構卻是匿藏僵化的所在

亻因 穿自由主義
西裝
領帶傷縛縮死喉結

亻因 強調所謂「文學主流價值」
像政客喊喝「主流民意」
主流卻是流浪街頭

亻因 封足濟文神
日夜呵咾崇拜
但是神攏毋捌發童降乩

亻因 佇紅供桌頂獻祭幾隻鹹魚
主流的魚永遠泅佇變動的大海
亻因 攏掠袂著