八屆閩客文學獎
客詩學生組
得奬作品評介
1 黃嘏紙
黃嘏(gu)紙，這係一首寫清明掛紙(掃墓))个詩。「黃嘏紙」係客家人掛紙(掃墓)時節，壓在墓上个黄紙。用黃嘏紙做題目就有創意，嘏，有福祉之意，「祝以孝告，嘏以慈告。」《禮記． 禮運》嘏又有古音，象徵慎終追遠个意象。作者一開始就頂真寫出，去掛紙時節个景色同心情：彎彎个路，拐來拐去， 青溜溜个山排， 一年一擺，從細到大，流傳有幾多世代？也寫出掛紙前墓地清理工作：大家共下合作，擧起刀嬤，拚掃淨俐。掛紙時節老輩同後生个時空差別：時間定定行過，矺在泥磚下个黃嘏紙， 見證時代个， 無共樣， 乜共樣。作者用掛紙時節，用熟練客語，流暢表達對祖先，傳統慎終追遠，承先啟後个淰淰思念同祈福。
2 捽仔
捽仔就係我等平常時講个橡皮擦 ，係我等從細用到大，盡輒會用到个物品，做得用來擦忒寫差个鉛筆字。毋故作者毋單祇恁樣寫，係將一垤捽忒个意義，擴充到各方面，發揮詩个頂真想像力：「一垤捽仔，捽忒惹惹杈杈个心思，捽忒無落無著个選擇，捽忒踏差个該條岔路。捽忒趖走个歲月，還我樂暢童年。捽忒阿爸个白頭那毛，化開佢个愁慮煩勞。捽忒阿姆面項个皺紋，還佢後生个笑容。」作者乜有幽默奇特詩想，有兜事情做毋得捽忒，分人會心一笑：記憶捽到麼个形都有，毋過
阿姆个叮嚀毋識捽淨。
3出外人个溫度
作者用特出詩想，觀察出外人，用熟練客語，寫出四種心情温度，第一種溫度溫燒溫燒，寫个係後生時節到外地讀書，打開都市新觸口心境：「後生時節離開家鄉，帶等爺哀个毋盼得」。畢業後求職上班，進入出外人第二種溫度越來越冷，變化忒大，異鄉人心情一下間無法度來適應：「阿姆話變做冰箱裡肚，該垤想食嗄無時間煮个半肥腈，尋去尋轉做得同麼人講？」第四種溫度，係有息把尷尬又燒又冷：「年紀越大越想轉去胞衣跡，毋過就係無田好耕，愛仰結煞，心情單淨寫在詩歌底肚，又做得唱分麼人聽？」本詩像剝洋蔥，一層一層剝開，分人盡大愐想。事實每一個人都係出外人，毋單祇係離開故鄉爺哀親人，在心理上共樣有内在个出外心境流轉感嘆，故所本詩寫个乜係人生變化，後生離家年老歸故鄉，遂變異鄉人，分故鄉無識个細人仔問，人客你從奈來吔？
posted by 陳寧貴詩人坊 @ 12:57 上午
0 comments
